PANGARATAION 28 - BIBEL JAMITA NA DENGGAN

Pasupasu di na mangoloi

¹ “Muda dioloi ho Tuhan Debatamu, jana dihaburjuhon ho patuluskon sude parenta na hulehen tu ho di ari sadari on, jadi baenon ni Tuhan ma ho gabe bangso na gumodang sian sude bangso na asing di portibi on.

² Oloi hamu ma Tuhan Debatamunu, jadi gabe lehenonNia ma sude pasupasu on tu ho:

³ Pasupasuon ni Tuhan ma ho di kota dohot di ladang i.

⁴ Pasupasuon ni Tuhan ma ho, gabe bahat anakmunu, marlobian suha ni ladangmunu jana bahat lombu dohot biri-birimunu.

⁵ Pasupasuon ni Tuhan ma suha ni gandummunu dohot sipanganon na nibaenmunu sian gandum i.

⁶ Pasupasuon ni Tuhan ma sude na nibaenmunu.

⁷ Muda ro musu mamorangi ho, taluhonon ni Tuhan ma halahi. Sian sada dalan do halahi ro mamorangi, tapi maporus ma halahi sian ho tu pitu dalan.

⁸ Pasupasuon ni Tuhan ma karejomunu jana gohanna angka talobatmunu dohot gandum. PasupasuonNia ma ho di tano na giot silehenonNia di ho.

⁹ Muda dioloi ho Tuhan Debatamunu jana dipatulus ho sude parentaNia, baenonNa ma ho gabe bangsoNa sandiri, songon na nijanjihonNa i.

¹⁰ Jadi gabe idaon ni bangso na satano on ma na dung dipili Tuhan ho gabe bangsoNia, jana mabiar ma halahi mida ho.

¹¹ Basa-basahononNa ma di ho bahat anak. Bahat ma pahan-pahananmunu jana marlobian suha ni ladangmunu di tano na nijanjihon ni Tuhan i tu ompumunu di hamu.

¹² Paroon ni Tuhan ma udan di hatihana sian inganan panyimpananna na bubung di langit. PasupasuonNia ma sude karejomunu, jana gabe tarbaen ho ma painjamkon tu bahat bangso tapi indangkon sai manginjam ho sanga na sian ise.

¹³ Baenon ni Tuhan ma ho gabe pamimpin di tonga-tonga ni angka bangso, jana nada gabe mangihut-ihut. Muda dioloi ho sude parenta ni Tuhan na hulehen tu ho sadari on, sai na manjadi do karejomunu jana nada jungada sundat.

¹⁴ Tapi ulang lolos-lolos ho di parenta i sude, sanga na bia pe pangalahona. Jana ulang mamele sanga mangoloi ho tu angka debata na asing.”

Patunda ni na so mangoloi

¹⁵ “Tapi muda nada dioloi ho Tuhan Debatamunu, jana nada setia ho patuluskon sude parenta dohot uhumNia na hulehen tu ho sadari on, gabe ampe ma tu ho bura na songon on:

¹⁶ Buraan ni Tuhan ma angka kota dohot ladangmunu.

¹⁷ Buraan ni Tuhan ma suha ni gandummunu dohot sipanganon na nibaen sian gandum i.

¹⁸ Buraan ni Tuhan ma ho, lopus gabe otik anak, suha ni ladang dohot lombu maradu biri-birimunu.

¹⁹ Buraan ni Tuhan ma sasude na nibaenmunu.

²⁰ Muda mambaen jahat ho jana manulak hamu di Tuhan, paroonNia ma parmaraan, hagaoron dohot hamaolon di sasude na nibaenmunu, jadi gabe abiskononna ma ho di hatiha na pendek sajo.

²¹ Marsingki-soluk ma nyae ro tu ho, lopus ujungna sahalak pe nada adong be na tinggal di tano na giot siingananmunu i.

²² Uhumon ni Tuhan ma ho dohot ragam ni nyae na posi, tbc, milas, radang. ParoonNia ma logo ni ari dohot alogo na mangombuskon lopus sego suha ni ladangmunu. Sai marpupu ro do bala on taononmunu lopus mate hamu sude.

²³ Nada ra ro udan, jana marpir ma tanomunu songon bosi.

²⁴ Songon gonti ni udan, diparo Debata ma udan abu dohot horsik lopus mate hamu sude.

²⁵ Muda nada dioloi ho Tuhan Debatamu, pamonangonNia ma angka musumunu mangalo ho. Porangonmunu ma halahi sian sada dalan, tapi maporus ma ho masarsar tu pitu dalan. Gaor ma sude bangso na satano on muda diida halahi na masa tu ho.

²⁶ Muda mate ho, marroan ma angka unggas dohot binatang panyoro jana papangananna ma bangkemunu, jana nada adong sahalak pe na mangayak angka binatang i.

²⁷ Hona uhum na ho baenon ni Tuhan marhite baro, songon na nibaenNa tu halak Mesir. Sap ma pamatangmunu dohot baro bope rasa na gatal tapi nada adong ubatna.

²⁸ Mago ma parningotanmunu baenon ni Tuhan; gabe mapitung ma ho jana lenong-lenong.

²⁹ Dadap-dadap ma ho di arian raya songon halak na mapitung, hape nada dapot ho dalan. Sai marpupu ma ho hona hapit jana hona rampas, jana sada halak pe nada adong na mangurupi ho.

³⁰ Muda nada dioloi ho Tuhan Debatamunu i, martunangan ma ho, – tapi halak na asing do mambuat tunanganmunu i. Pajongjong bagas ma ho – hape nada ingananmunu bagas i. Suananmunu ma kobun anggur – hape nada ho mangankon batu ni anggur i.

³¹ Sambolon ma lombumunu di jolo ni matamunu, hape nada panganonmunu saotik pe sian juhutna i. Diiring ma angka halodemunu kehe dipaida-ida ho, jana nada paulahonna be i mangulahi tu ho. Parlehenon ma biri-birimunu i tu angka musumunu, hape umpe sahalak na mangurupi ho.

³² Di jolo ni matamu lehenon ma anak dohot borumu gabe hatoban tu halak sileban. Maniak ma matamunu ganop ari hara ni na manjalahi dakdanakmunu i, hape magopo do angke nada mulak be halahi.

³³ Pambuatan ni halak sileban ma suha ni ladang na nikarejohonmunu maradu gogo, hape sanga aha pe nada dijagit ho asing ni na marpupu diparkanciti dohot pambaenan na kejam.

³⁴ Gabe rintik ma ho hara ni parkancitanmunu i.

³⁵ Baenon ni Tuhan ma patmunu sap baro na mangintasi boti na so ra malum; sian pat lalu tu ambubumunu sap sude baro-baroon.

³⁶ Muda nada dioloi ho Tuhan Debatamunu, obanon ni Tuhan ma ho dohot rajamunu tu tano sileban, luat na so unjung diingani ho bope ompumunu. Mangoloi tu angka debata na nibaen sian hayu dohot batu ma ho disi.

³⁷ Tarsonggot be ma angka jolma na marnida ho di inganan parserahanmunu dibaen Tuhan paida-ida na masa di ho; siincak-incahan ni halak ma ho jana sipartataanna.

³⁸ Saburkononmunu ma bahat same, hape saotik sajo do suhana dapot ho, angke papanganan ni siapor do na nisuanmunu i.

³⁹ Suananmunu ma angka kobun anggur jana pature-tureonmunu ma i, hape nada adong putihonmunu parbatuna sanga inumonmunu aek ni anggurna, angke papanganan ni ulok-ulok do bona ni anggur i.

⁴⁰ Martubuan do angka bona ni zetun di luatmunu, hape marurus do batuna i, gabe nada adong dapot ho miak ni zetun i.

⁴¹ Sorang ma anak dohot boru di ho, hape buaton do halahi gabe taban di porang, gabe agoan ma ho di halahi.

⁴² Abis ma bona ni hayu dohot suan-suananmunu panganon ni angka siapor.

⁴³ Mur markuaso ma halak sileban na maringanan di tanomunu, hape anggo kuasomunu mur tu murakna.

⁴⁴ Marhepeng ma halahi sipainjamkononna tu ho, hape anggo ho so adong bagi na ahamunu sipainjamkononmunu tu halahi. Jana ujungna markuaso muse ma halahi tu ho.

⁴⁵ Ampe tu ho ma sude bura on, jana torus ma i marroan tu ho lopus abis ho, hara ni na so mangoloi ho tu Tuhan Debatamunu jana nada dipatulus ho sude uhum na nilehenNia i tu ho.

⁴⁶ Sudena i ma na gabe bukti ni uhuman ni Tuhan tu ho dohot pomparanmunu salolot-lolotna.

⁴⁷ Madung dipasupasu Tuhan ho di sude pangalaho, hapengani nada ra ho mangoloi Ia mardongan jop ni roha dohot hamogaan.

⁴⁸ Hara ni i ma gabe angkon mangoloi ho tu angka musu na giot sitongoson ni Tuhan laho mangalo ho. Tangkuraparon, manguas jana marsaemara ma ho – hurangan di sasudena. Kejam baenon ni Tuhan manyosak ho lopus abis ho.

⁴⁹ Paroon ni Tuhan ma sada bangso na so mangarti ho hatana, sian ujung ni tano on laho mangalo ho. Songon rajawali do halahi manyoro ho.

⁵⁰ Kejam do baenon ni halahi jana nada mamake ibo ni roha sanga na tu ise pe, bope tu na matobang bope tu na poso.

⁵¹ Pangabison ni halahi ma pahan-pahanan dohot suha ni ladangmunu. Saotik pe nada adong tadingkonon ni halahi sian gandum, aek ni anggur, miak zetun, lombu sanga hambengmunu lopus mate tangkuraparon ho.

⁵² Porangan ni halahi ma ganop kota na adong di tano na giot silehenon ni Tuhan Debatamunu i di ho; matolbak ma angka tembok ni kota na nipatogu jana na nipangasahonmunu i.

⁵³ Di na nihobuk ni angka musumunu angka hutamunu, topet ma ho hatiha mandele hara ni na tangkuraparon, gabe papangananmunu ma angka dakdanakmunu sandiri na nibasa-basahon ni Tuhan Debata tu ho.

⁵⁴ Salang anak na mora parroha na dumenggan pe, songon i ma arsak ni rohana salolot na hona hobuk i, lopus panganonna deba sian anakna sandiri hara ni na so adong be panganon na asing.

⁵⁵ Saotik pe nada lehenonna panganonna i di kahanggina sanga di dongan saripe haholongan ni rohana sanga di angka dakdanakna na mangolu i dope.

^56-57 Salang boru ni na mora parroha na dumenggan pe jana na songon i kayo na so unjung mardalan pat sanga na tu dia, laing songon i ma baenonna. Muda dihobuk musu hutana i mandele ma ia hara ni na tangkuraparon, jadi gabe sip-sip ma ia mangankon anakna na baru sorang dohot anggi-anggina i. Saotik pe sian sipanganon i nada lehenonna tu halaklahina na nihaholongan ni rohana sanga pe sada sian anakna i.

⁵⁸ Muda nada dihaburjuhon ho mangoloi sude pangajaran ni Tuhan Debatamunu na tarsurat di bagasan buku on, jana nada dipasangap ho goar ni Tuhan Debatamunu na marmulia jana hahomangan i,

⁵⁹ paroon ni Tuhan ma tu ho dohot tu pomparanmunu angka nyae na so tarpamalum dohot angka nyae na mangalangkoti na so haantahan.

⁶⁰ Angka nyae na jorbut na nitaonmunu di Mesir, mangulahi ma i aeonmunu, jana nada ra be malum ho.

⁶¹ Laing paroon ni Tuhan muse ma ragam ni nyae dohot bala na so disuratkon di buku on, di buku ni uhum sude, lopus dipamate Ia hamu sude.

⁶² Haru pe na dung sabahat ni bintang na di langit bilanganmunu, hum saotik sajo noma na tinggal mangolu, hara ni na so mangoloi hamu tu Tuhan Debatamunu.

⁶³ Songon jop ni roha ni Tuhan mangalehen hadumaon di ho dohot patamba bilanganmunu, laing songon i muse ma sonang ni rohaNia mangabisi ho dohot maroban hasesego tu ho. UmpatonNa ho sian tano i, na so sadia lolot nari be lehenonNa baen ingananmunu.

⁶⁴ Paserahon ni Tuhan ma ho di tonga-tonga ni angka bangso, sian ujung na sada tu ujung na sada nari di tano on. Sombaonmunu ma disi angka debata na dibaen sian hayu dohot batu, i ma angka debata na so unjung hian disomba ho dohot ompumunu.

⁶⁵ Sanga na di dia pe nada adong dapot ho hasonangan, nada adong sada inganan na tardok ho songon ho puna; baenon ni Tuhan ma ho gamang sajo, nada adong arop ni roha, jana gok pandelean.

⁶⁶ Sai na mangondam ma torus parmaraan di ngolumunu. Arian na borngin sai na digohi hajorbutan ma ho jana sai tongtong ma digohi biar giot mate ngolumunu.

⁶⁷ Gumadobuk ma taroktokmunu hara ni biar marnida sanga aha. Manyogot dope hurang tibu ro borngin, jana muda borngin-borngin intean ho di arian.

⁶⁸ Tongoskonon ni Tuhan ma ho mangulahi markapal tu Mesir, haru pe na dung Hudok na so mulak be ho sanga na andigan tusi. Pagadis-gadisonmunu ma dirimunu disi gabe hatoban halaklahi dohot hatoban dadaboru tu musumunu, hape sahalak pe nada adong na manobusi.”