PANGARATAION 22 - BIBEL JAMITA NA DENGGAN

Taringot tu na marsiurupan

¹ Muda diida hamu lilu lombu sanga biri-biri ni dongan sabangsomunu Israel, ulang dipaula so niboto, tapi oban ma pahan-pahanan i mulak tu nampuna i.

² Tapi muda dao nampuna i sian bagasmu, sanga nada diboto hamu nampunasa, oban ma pahan-pahanan i tu bagasmu. Muda ro nampuna i manjalahisa, pasahat ma pahan-pahanan i tusia.

³ Laing sarupa ma baen hamu, muda adong dapot hamu sada halode, sada baju, sanga aha sajo pe tehe nampuna ni dongan sabangsomu na mago.

⁴ Muda tinggang halode sanga lombu ni dongan sabangsomu di dalan, ulang ma dipaula so diboto hamu, tapi urupi hamu ma ia manogu pajongjong pahan-pahanannia i mangulahi.

⁵ Angka dadaboru, ulang ma mamake pakean songon pakean ni halaklahi, jana halaklahi ulang ma marpakean songon pakean ni dadaboru, angke goyak do roha ni Tuhan Debatamu di halak na mambaen songon i.

⁶ Muda ampot dapot hamu sada asar ni unggas di hayu sanga di tano na modomkon indukna i di ginjang ni pirana i sanga rap dohot anakna, ulang ma tangkup hamu indukna i.

⁷ Anggo anakna i tola do buatonmunu, tapi anggo indukna i padiar ma habang, anso ginjang umurmunu jana sonang ngolumunu.

⁸ Muda pajongjong bagas hamu, angkon baenonmunu do handang humaliang tarupna i. Gabe nada hamu be martanggung jawab ampot adong sanga na ise na madabu sian tarup i lalu mate.

⁹ Ulang suan hamu suan-suanan na asing rap dohot bona ni anggurmunu. Muda laing disuan hamu do i, nada tola buatonmunu batu ni suan-suanan i, bope dohot hasil ni anggurmi.

¹⁰ Ulang pasang hamu sada lombu dohot sada halode di sada tinggala.

¹¹ Ulang pake hamu wol dohot linen di sada abit tonunan gabe pakeanmunu.

¹² Baen hamu ma rambu-rambu ni pakeanmunu di ujungna na opat i.”

Aturan taringot tu parbagason

¹³ “Marbagas ma umpamana sada bayo dohot sada anak boru, jana madung rap modom halak i, diputuskon bayo i ma na so giot be ia di anak boru i.

¹⁴ Jadi gabe dipatubu-tubu ia ma hata na so tutu maradopkon ripenia i mandok na so bujing-bujing be anak boru i di na mamungka ripe halahi.

¹⁵ Di bagasan pangalaho na songon on, angkon obanon ni simatobang ni anak boru i do abit boru na marmudar i paboa na tutu do laing bujing-bujing anak boru i. Angkon patuduhonon ni halahi do abit i di harbangan ni kota tu angka hatobangon ni kota i.

¹⁶ Angkon dokkonon ni simatobang ni anak boru i do tu halahi, ‘Na dung hupasahat do borungkon tu bayo i gabe ripenia, hape saonnari nada giot ia be.

¹⁷ Dipatubu-tubu ia do hata na so tutu tu borungki, didok ia nada bujing-bujing be borungki di na mamungka marsaripe halahi. Tapi ligi hamu, indon ma tandana bahaso na bujing-bujing do borungki. Patangkas hamu ma mudarna i di abit borunia i!’

¹⁸ Jadi angkon pioon ni hatobangon ni kota i ma halaklahina i jana balbalon ni halahi ma ia.

¹⁹ Angkon mandangdangi muse do ia baenon ni halahi saratus hoping perak jana pasahatonnia hepengna i tu amang ni ripenia i, dibaen martilako sangap ni sada boru Israel dibaen ia. Tambana muse, hot do anak boru i ripenia jana nada tarsirangkon halaklahinia i ia salolot ia mangolu.

²⁰ Tapi muda tutu do antong hata na nidok ni bayo i, jana nada adong buktina paboahon na tutu bujing-bujing anak boru i di na mamungka marripe halahi,

²¹ jadi angkon obanon ma anak boru i tu pintu ni bagas ni amangna i. Disi ma dangguran ni halaklahi na di kota i ia dohot batu lopus mate. Na mambaen hahaila do anak boru i di bangsonta hara ni na marcampur ia dompak so marbagas dope, taran di bagas ni amangnia dope ia. Songon i ma dalanna baenonmunu laho mangagohon hajahatan i.

²² Muda tardapot sada halaklahi hatiha marcampur dohot dadaboru ni halak na asing angkon mate niuhuman do i dua-dua. Songon i ma dalanna baenonmunu mangagohon hajahatan i.

²³ Umpamana adong ma sada bayo na tardapot marcampur dohot sada bujing-bujing na dung martunangan dohot halak na asing.

²⁴ Muda di pangalaho na songon on, angkon obanonmunu do halahi tu balian ni kota, jana nidangguran ma halahi dohot batu lopus mate. Angkon dibunu do bujing-bujing i dibaen nada mangangguhi ia mangido tolong, haru pe di bagasan kota do ia, tarbege hian do nian sorania. Jana angkon bunuon do bayona i hara ni na marcampur ia dohot sada bujing-bujing na dung martunangan. Songon i ma baenonmunu mangagohon hajahatan i.

²⁵ Umpamana adong ma sada bayo di ladang na mamaksa sada bujing-bujing na dung martunangan, anso marcampur. Anggo di pangalaho na songon on, hum halaklahi i do na angkon mate hona uhum.

²⁶ Anggo anak boru i nada tola hahuaon, angke nada adong dibaen ia sanga na aha na patut mate hona uhum ia. Sarupa do uhumanna songon di parkaro ni sada bayo na mangaroro halak na asing lalu dibunusa.

²⁷ Dipaksa ia bujing-bujing na dung martunangan marcampur dohot ia di ladang, jadi haru pe mangangguhi ia mangido tolong, nada adong halak na ro mangurupisa.

²⁸ Adong ma umpamana sada halaklahi na tardapot mamaksa marcampur tu sada bujing-bujing na so martunangan dope.

²⁹ Di bagasan pangalaho na songon on, angkon manggarari ma bayo i tu simatobang ni anak boru i bolina mararga lima pulu hoping perak, jana angkon buatonnia anak boru i gabe ripenia hara ni na nipaksa ni bayo i ia marcampur dohot ia. Salolot di ngolunia, nada tola sirangkononnia ripenia i.

³⁰ Sahalak pe nada adong na tola pabilehon amangna marhite na mangangkupi modom sahalak sian dadaboru ni amangna.”