PANGARATAION 20 - BIBEL JAMITA NA DENGGAN

Aturan taringot tu porang

¹ “Muda kehe hamu marporang mangalo angka musumunu, ulang hamu mabiar mida kareta dohot kudo ni halahi na bahat bope na umbahat bilanganna sian hamu. Tuhan Debatamunu do paluahon hamu sian Mesir, laing Ia do mandongani hamu.

² Painte so dipungka hamu porang i, angkon jolo maju ma tu jolo sada halak malim mandok hata tu tentaramunu mandok songon on,

³ ‘Hamu angka donganku sabangso! Di ari sadari on, na giot kehe ma hamu marporang. Ulang hamu mabiar tu angka musumunu i, sanga lepe, sanga pe golap rohamunu.

⁴ Kehe do Tuhan Debatamunu mandongani hamu jana lehenonNia do hamonangan di hamu.’

⁵ Dung i angkon dokkonon ni angka komandan do hata on tu angka tentara i, ‘Adong do ulaning sanga na ise dison na baru pajongjong bagas, na so mambaen pesta marmasuk bagas dope? Anggo adong do, angkon mulak do ia. Angke muda hona bunu ia di parporangan, tontu gabe halak na asing noma na mambaen upacara marmasuk bagas i.

⁶ Adong do dison na baru manyuan kobun anggurna jana na so sanga dope mamutik parbatu ni anggurna i? Muda adong do, angkon mulak do ia. Angke muda hona bunu ia di parporangan, gabe halak na asing noma antong na mandai aek ni anggurnia i.

⁷ Adong do dison sanga na ise na dung martunangan giot mambuat boru? Muda adong do, angkon mulak do ia. Angke muda hona bunu ia di parporangan, gabe halak na asing noma mambuat tunangannia i.’

⁸ Angkon dokkonon ni angka komandan muse dope tu angka jolma i songon on, ‘Adong dehe dison na gugup dohot na mabiar? Muda adong do, angkon mulak do ia. Muda nada mulak ia, mambaen sego do i tu semangat ni donganna na asing.’

⁹ Dung sidung angka komandan mandok hata tu tentara i, angkon pilion do angka pamimpin di ganop rombongan.

¹⁰ Muda kehe hamu mamorangi sada kota, jolo lehen hamu ma hatiha di halak kota i laho tunduk.

¹¹ Anggo dibuka halahi do antong angka pintu horbangan jana tunduk halahi, angkon gabe hatobanmunu ma halahi sude jana marrodi ma halahi di hamu.

¹² Tapi sugari sura umpamana nada ra angka halak na di kota i tunduk, jana gumonan di halahi marporang, angkon hobuhonmunu ma kota i dohot tentaramunu i.

¹³ Dung i muse, muda dipadiar Tuhan Debatamunu do hamu mangarampas kota i, angkon bunuonmunu do sude halaklahi na adong di kota i.

¹⁴ Tola do pakeonmunu sandok bagi na aha nampuna ni angka musumunu i. Na dung dipasahat ni Tuhan Debatamunu do i tu hamu.

¹⁵ Angkon songon i ma baenonmunu maradopkon angka kota na dao sian tano na giot siingananmunu i dohot kota na so tarmasuk tu kota ni angka bangso na dison.

¹⁶ Tapi muda angka kota na adong di luat na giot silehenon ni Tuhan i do tu hamu na giot taluhononmunu, jadi angkon bunuonmunu do sude halak na mangingani kota i.

¹⁷ Angkon abiskononmunu do sude bangso i: Halak Het, Amori, Kanaan, Peris, Hewi dohot Jebus, songon na dung diparentahon Tuhan i tu hamu.

¹⁸ Angkon bunuonmunu do halahi, anso ulang mardosa hamu maradopkon Tuhan hara ni na mangihut di pangajaran ni halahi laho mambaen angka pangalaho hagigian na nipatupa ni halahi di na mamele angka debata ni halahi.

¹⁹ Muda hatiha topet manggogo hamu manaluhon sada kota, ulang tabai hamu angka bona ni suan-suananna, haru pe angkon maradu lolot ari-ari na manghobuk i. Pangan hamu ma batu ni suan-suanan i, tapi ulang segoi hamu bonana i, angke nada dohot musu anggo suan-suanan i.

²⁰ Hayu na so marparbatu do na tola tabaonmunu anso adong baenon handang pangambat lopus dapot kota i.”