PANGARATAION 10 - BIBEL JAMITA NA DENGGAN

Dijagit si Musa mangulahi Parenta Na Sampulu i

¹ “Dung i didok Tuhan ma tu au, ‘O Musa, tuhil ma dua batu songon na parjolo i, jana baen muse ma sada poti hayu baen ingananna, dung i ro ma ho tu Au di puncut ni dolok i.

² Giot suratonKu di batu i angka hata na Husuratkon di batu na nitaporkonMi, dung i angkon pamasuhonMu ma i tu bagasan poti i.’

³ Dung i hubaen ma sada poti sian hayu akasia jana hutuhil ma dua batu songon na salpu i, lalu huoban ma i tu ginjang dolok i.

⁴ Dung i disuratkon Tuhan ma di batu i Parenta Na Sampulu i, i ma angka hata na sarupa songon na nisuratNia i di na parjolo i. Madung dilehen Ia angka parenta i tu hamu, di na mangkuling Ia tu hamu sian tonga-tonga ni api di ari i dompak na marlagut hamu di pangkal ni dolok i. Dung sidung dilehen Tuhan batu i tu au

⁵ mulak ma au manigor manuat sian dolok i. Dung salpu i, hombar tu na niparentahon ni Tuhan, hupamasuk ma batu na dua i tu bagasan poti na hubaen i – jana lopus saonnari laing disi do batu i.” (

⁶ Mardalan muse ma halak Israel sian sumur ni halak Jaakan, lalu kehe tu Mosera. Disi ma marujung ngolu ni si Harun lalu ditanom. Gabe anaknia si Eleasar ma manggonti ia gabe malim.

⁷ Sian i kehe ma halahi tu Gudgod, dung i torus tu Jotbata, luat na bahat batang aekna.

⁸ Di dolok i dibaen Tuhan ma Marga Levi marhapunjungan mangurus Poti Parjanjian i dohot mangoloi Tuhan gabe angka malim dohot mandok hata pasupasu mangasahon goarNia. I ma karejo ni halahi lopus saonnari.

⁹ I ma dalanna nada manjagit tano Marga Levi songon angka marga na asing; hasangapan do na nijagit ni halahi anso gabe malim ni Tuhan songon na nijanjihon ni Debata.)

¹⁰ “Opat pulu ari opat pulu borngin au di dolok i, songon na hubaen di na parjolo i. Ditangihon Tuhan dope au sanoli nari; jana Ia pe antong satuju ma nada pola pusaonNia be hamu.

¹¹ Dung i disuru Ia ma au kehe laho mamimpin hamu anso bolas hamu gabe nampuna tano na dung dijanjihonNia tu ompumunu.”

Tuntutan ni Tuhan

¹² “Saonnari hamu ale angka dongan sabangso, parate-atehon hamu ma na nituntut ni Tuhan Debatamunu sian hamu: Maribadat tu Tuhan ma hamu jana patulus hamu sandok na niparentahonNia. Haholongi hamu ma Ia, sian sandok rohamunu dohot tondimunu ma oloi hamu Ia,

¹³ jana oloi hamu ma sude aturanNia, na hulehen tu hamu di ari sadari on na laho tu hadenggananmunu sandiri.

¹⁴ Tuhan Debatamunu do nampuna langit na partimbo, tano on pe Ia do nampunasa, maradu sude na adong di ginjangna.

¹⁵ Songon i ma godang ni holong ni roha ni Tuhan mida ompumunu, gabe hamu ma na nipiliNia jana nada bangso na asing jana lopus tu saonnari pe laing hamu do na tarpili gabe bangsoNia.

¹⁶ Jadi mamungka sian saonnari, sai marpangoloion ma hamu tu Tuhan jana ulang be marjogal ni roha hamu.

¹⁷ Di ginjang ni sude debata do Tuhan Debatamunu i jana Tuhan ni sasudena tuan, Debata na tongam jana na markuaso do Ia jana angkon nioloan. Nada ra Ia marpihak jana nada ra muse Ia manjagit sisip.

¹⁸ Dibela Ia do hak ni na tinggal menek dohot na mabalu, anso dibaen tu halahi uhum na tigor; dihaholongi Ia do halak na asing na tinggal rap dohot hita jana dilehen Ia pakean dohot sipanganon di halahi.

¹⁹ Jadi hamu pe patut do patuduhononmunu holong ni roha tu angka halak na asing i, angke hamu pe najolo halak na asing do di Mesir.

²⁰ Habiari hamu ma Tuhan Debatamunu, jana tuSia sajo ma hamu mangoloi. Sai hot ma hamu setia tuSia jana mangasahon goarNia ma baen hamu angka janjimunu.

²¹ Puji ma Ia – Ia do Debatamunu. Diida matamunu sandiri do angka pambaenan na godang jana hahomangan na nibaenNia hara ni hamu.

²² Di na kehe ompumunu tu Mesir, hum pitu pulu halak do bahat ni halahi. Hape dibaen Tuhan Debatamunu do bahat ni bilangan ni halahi sabahat ni angka bintang na di langit i.”