PAMUNGKAAN 9 - BIBEL JAMITA NA DENGGAN

Parjanjian ni Debata dohot si Noak

¹ Dipasupasu Debata ma si Noak dohot angka dakdanaknia i jana didok Ia ma, “Maranak marpahompu ma hamu, anso diingani pomparanmunu tano on sude.

² Mabiar ma mida hamu sandok binatang, unggas dohot ihan sude. Di toru ni kuasomunu ma i sude.

³ Jana saonnari tola ma panganonmunu i sude tamba ni angka simarata; Hupasahat ma i sude gabe sipanganonmunu.

⁴ Hum on ma na so tola panganonmunu, i ma juhut na laing marmudar; harana di mudar i do hosa.

⁵ Muda adong sanga ise na mambuat hosa ni jolma, uhumon do i. MatehononKu do sandok binatang na mambuat hosa ni jolma.

⁶ Songon Debata do jolma i ditompa, jadi hara ni i sanga ise na mambuat hosa ni jolma, bunuon ni jolma muse ma ia.

⁷ Olo tutu, angkon maranak marpahompu ma hamu bahat-bahat, anso diingani pomparanmu tano on sude.”

⁸ Didok Debata ma tu si Noak dohot angka anaknia,

⁹ “Saonnari baenonKu ma parjanjian dohot hamu bope dohot pomparanmunu,

¹⁰ dohot tu sude na mangolu, i ma angka unggas sudena, binatang, pendekna tu sude na ruar sian kapal i rap dohot hamu.

¹¹ Di na Hudok on ma Hubaen parjanjian dohot hamu: Marjanji ma Au, na so bunuon ni aek na oto be sandok na mangolu. Sada aek na oto pe nada adong be manyegohon tano on.

¹² Songon tanda ni parjanjian, salolot ni lolotna na Hubaen dohot hamu bope dohot angka na mangolu,

¹³ gabe Hubaen ma di ombun i halibutongan. I ma tanda ni janjingKu dohot portibi on.

¹⁴ Ganop Hututupi langit dohot ombun i, gabe tarida ma halibutongan i,

¹⁵ ingotonKu ma janjingKu na tu hamu dohot tu sandok binatang, i ma na so bunuon ni aek na oto be sandok na mangolu.

¹⁶ Sanga andigan tarida halibutongan di ombun i, idaonKu ma i jana ingotonKu ma parjanjianKu na hot i, antara Au dohot sandok na mangolu di tano on.

¹⁷ I ma tanda ni janjingKu na Hulehen tu sandok na mangolu di tano on.”

Si Noak dohot angka dakdanaknia

¹⁸ Anggo dakdanak ni si Noak na ruar sian kapal i, i ma si Sem, si Ham, si Jafet. (Si Ham i ma ama ni si Kanaan.)

¹⁹ Anak ni si Noak na tolu halak on ma ompu ni sude jolma na satano on.

²⁰ Partani do anggo si Noak. Ia ma na parjolo mambaen kobun anggur.

²¹ Jadi dung diinum ia anggurnia i, gabe mabuk ma ia. Ditalduskon ia ma sandok pakeannia i, modom ma ia marsaemara di bagasan undung-undungnia i.

²² Di na ro si Ham amang ni si Kanaan i, diida ia ma amangnia i marsaemara, jadi ruar ma ia paboahon tu kahangginia na dua i.

²³ Dung i ro ma si Sem dohot si Jafet maroban sada abit, dipahirbang ma i di pudi ni halahi, jana ditiop ma i di abara ni halahi. Dung i mardalan pudi ma halahi masuk tu undung-undung i laho mangulosi amang ni halahi dohot abit i. Dipadao halahi ma panaili ni halahi anso ulang diida halahi amang ni halahi na marsaemara i.

²⁴ Dung tarsunggul si Noak sian na mabuk i, jana diboto ia ma sanga na bia pambaen ni anaknia siampulan i tusia,

²⁵ didok ia ma, “Hona bura ma si Kanaan! Gabe hatoban ni angka kahanggina ma ia.

²⁶ Pinuji ma Tuhan, Debata ni si Sem! Gabe hatoban ni si Sem noma si Kanaan.

²⁷ Sai ditambai Debata ma pasupasu tu si Jafet. Jana mur mabidang ma inganannia. Sai rap sauduran ma pomparannia dohot pomparan ni si Sem. Hatoban ni si Jafet noma si Kanaan.”

²⁸ Dung salpu aek na oto i, mangolu dope si Noak 350 taon nari.

²⁹ Marumur ma ia 950 taon di na marujung ngolunia.