PAMUNGKAAN 8 - BIBEL JAMITA NA DENGGAN

Parsidung ni aek na oto i

¹ Nada dihalupahon Debata si Noak rap dohot sude binatang na adong di bagasan kapal i; mangombus ma alogo dibaen Debata gabe mamungka ma surut aek i.

² Sude mata mual na di laut na bidang i di toru ni tano dohot sude pintu ni aek na di langit tartutup ma. So ma udan,

³ jana sumurut ma aek i 150 ari honokna.

⁴ Di ari pitu bolas bulan papituhon mantul ma kapal i di sada dolok di Luat Ararat.

⁵ Torus sumurut do aek i jana di ari parjolo bulan pasampuluhon, mamungka ma tarida puncu ni angka dolok.

⁶ Dung salpu opat pulu ari, diungkap si Noak ma sada jandela ni kapal i,

⁷ jana dipalua ia ma sada unggas sigawak. Nada mulak unggas i tu kapal i, tapi sai habang-habang do ia pahae pahulu lopus nada adong be aek di tano i.

⁸ Jadi dipalua si Noak muse ma sada darapati laho patangkaskon sanga na dung surut aek i.

⁹ Tapi dibaen ditutup aek i dope sude tano, nada dapot darapati i inganan hasonggopanna. Jadi gabe mangulahi ma ia ro tu kapal i, jana disurduhon si Noak ma tanganna pamasukkonsa mangulahi tu bagasan.

¹⁰ Dipainte si Noak ma pitu ari nari dung i dipalua ia ma mangulahi darapati i.

¹¹ Dung andospotang ro ma mangulahi darapati i mandapotkon si Noak maroban bulung ni zetun na rata sangkarambar di tuktukna i. Sian i diboto si Noak ma na dung surut aek na oto i.

¹² Dipainte ia ma pitu ari nari, dung i dipalua ia ma darapati i sanoli nari, tapi nada mulak be tusia darapati i.

¹³ Di na marumur 601 taon si Noak, di ari parjolo bulan parjolo madung mahiang sudena. Dibuka si Noak ma pintu ni kapal i, jana mangaranap ma ia humaliang. Diida ia mamungka mahiang ma tano i.

¹⁴ Di ari dua pulu pitu bulan paduahon, madung mahiang sude tano i.

¹⁵ Jadi didok Debata ma tu si Noak,

¹⁶ “Ruar ma ho sian kapal i dohot dadaborumi, angka anakmu dohot dadaboru ni halahi.

¹⁷ Paruar ma sude unggas dohot binatang i, anso tarbaen halahi mamopari jana mamarpar di sude tano on.”

¹⁸ Jadi ruar ma si Noak sian kapal i rap dohot dadaborunia, angka dakdanaknia bope dohot angka dadaboru ni dakdanaknia i.

¹⁹ Ruar ma sude binatang dohot unggas sian kapal i marsidongani horongna be.

Pasahat haul ma si Noak

²⁰ Dipajongjong si Noak ma sada langgatan di Tuhan, dibuat ia ma sada binatang dohot unggas na so haram sian ganop horong, ditutung ia ma i himpal-himpal songon haul somba-somba di ginjang ni langgatan.

²¹ Moga ma Tuhan dibaen uap na huskus sian haul somba-somba i, jana didok Tuhan ma di bagasan rohaNia, “Nanggo buraanKu be portibi on hara ni pangalaho ni jolma; Huboto, sian haposoon ni jolma i do jahat pikiranna. Nada uhumanKu be sude jolma na mangolu, songon na baru Hubaen i.

²² Salolot adong tano on, tongtong ma masa suanon dohot sabion, ari ngali dohot ari las, logo ni ari dohot nonat, arian dohot borngin.”