PAMUNGKAAN 49 - BIBEL JAMITA NA DENGGAN

Hata ni si Jakob na parpudi

¹ Dung i dipiohon si Jakob ma angka dakdanaknia i, didok ia ma, “Marlagut ma hamu tu lambungkon, anso hupaboa tu hamu sanga aha na giot masa tu hamu di pudian ni ari.

² Marlagut ma jana tangihon hamu ma, ale angka anak ni si Jakob. Parrohahon hamu ma si Israel, amangmunu.

³ Si Ruben, anakku siangkaan, ho do di au hagogoan. Parbatu na parjolo tanda na halaklahi au, ho do na tumongam jana na gumogo sian angka dakdanakku.

⁴ Songon aek magodang na marhusasak do ho, tapi nada ho be sipatujoloon. Angke didongani ho modom radingku. Dipahodar ho podoman ni amangmu.

⁵ Martinadohon do si Simeon dohot si Levi. Mangasahon hajungkatan do dipake halahi sinjatana.

⁶ Nada parsidohot au di pokat ni halahi. Angke mamunu do halahi di hatiha ro rimas ni halahi. Diloncingi halahi do lombu palalu-lalu tagas.

⁷ Hona bura ma halahi di rimasna, hara ni jorbutna. Hona bura ma halahi di rimasna, hara ni kejamna. Paserahonku ma halahi di sude Israel. Sarsarkononku ma halahi, di tonga-tonga ni halak pangisina.

⁸ Anggo si Juda, pujion ni angka kahanggimu ma ho, jomahonmu do tangkuhuk ni musumu, jana manungkap angka kahanggimu di jolomu.

⁹ Songon singa do si Juda. Matehononna do soroanna, jana mulak tu asarna, marngeat ma ia lalu modom-modom. Nada adong umpe sahalak na puluk paorotkon ia.

¹⁰ Tiopon ni si Juda ma tungkot harajaon. Mamarenta ma pomparanna sapanjangna. Marroan ma angka bangso pasahat somba-sombana. Jana manungkap tanda tunduk di jolona.

¹¹ Tambatonna do anak ni halodena di bona ni anggur, di bona ni anggur na jumengkar. Basuonnia ma pakeannia dohot anggur, anggur na rara songon mudar.

¹² Rara ma matania hara ni na minum anggur i. Bontar ma iponnia hara ni na minum susu i.

¹³ Si Zebulon ma na maringanan donok tu laut. Ro ma angka kapal di topina marlabu, lopus tu Sidon bidang ni luatna.

¹⁴ Songon halode na gogo do si Isakar. Na modom di antara ni palano.

¹⁵ I noma dengganna diida ingananna i, songon i ma antong jeges ni luat i, mamuhung ma ia mamorsan boban, parkarejo na hona paksa songon naposo.

¹⁶ Anggo ho Dan, pimpinonmu ma bangsomu. Lopus sarupa tu angka marga ni Israel na asing kahanggimu.

¹⁷ Sai songon ulok na di dalan ma si Dan. Songon ulok na marbisa di topi ni dalan na gogot. Na manurbing tambihul ni kudo. Lopus sampak sipangalombut.

¹⁸ O Tuhan, hum haluaan na sian Ho do na hupainte-inte.

¹⁹ Roroan ni angka pangarampas ma si Gad. Tapi gabe si Gad do muse mangarampas halahi.

²⁰ Sian tano ni si Aser ma ro panganon na tabo. Patut parsaulian di raja-raja.

²¹ Si Naftali, songon ursa na malua do, angka anakmu pe jogi tompana.

²² Si Josep songon bona ni anggur na napu, di lambung mata mual ia tubu, angka rantingna manjurur manjarampak tu ginjang ni tembok.

²³ Kejam do angka tukang pana mamorangi ia, mamana dohot mangkojar ia.

²⁴ Tapi laing hot do togu panania i, jana tangannia tong-tong margogo, hara ni kuaso ni Parmahan Na Gumogo, Debata ni si Jakob dolok batu ni Israel.

²⁵ Debata ni amangmu ma mangurupi ho, Na Gumogo i ma mamasumasu ho marhite pasupasu sian langit na di ginjang dohot pasupasu sian aek na di toru ni tano, marhite anak dohot pahan-pahanan.

²⁶ Gumodang do pasupasu ni amangmu, sian pasupasu ni angka dolok na santak tobang, jana na tumabo sian angka tor na hot. Sai mijur ma sude angka pasupasu i tu ulu ni si Josep, tu ginjang ni bohi ni na sumurung sian kahanggina.

²⁷ Si Benyamin, songon sorigala na manggasa-gasa. Manyogot ni ari manjomak soroanna, jana hatiha potang ari dibagi-bagi ia na nirampasna i.”

²⁸ I ma na dua bolas marga ni Israel, jana i ma na nidok ni amang ni halahi di na mandok hata parsirangan tu halahi sada-sada be.

Marujung ma ngolu ni si Jakob jana dikuburkon

²⁹ Dung i martona ma si Jakob tu angka dakdanaknia, “Santongkin nari marujung mangolungku songon ompu na umpompar au. Di lambung ni halahi ma au kuburkon hamu di bagasan liang na di ladang ni si Efron halak Het i

³⁰ di Makpela na di Habincaran ni Mamre na di tano Kanaan. Na nitobusan ni si Abraham do ladang i sian si Efron baen tano kuburan.

³¹ Disi do dikuburkon si Abraham dohot si Sara, si Ishak dohot si Ribka; disi muse do hukuburkon si Lea.

³² Ma ditobusi ladang dohot liang na disi i sian halak Het. Disi ma au kuburkon hamu.”

³³ Jadi dung sidung didok si Jakob tonania tu angka dakdanaknia i, dipapodom ia ma, jana marujung ma ngolunia.