PAMUNGKAAN 46 - BIBEL JAMITA NA DENGGAN

Kehe ma si Jakob tu Mesir dohot angka dakdanaknia

¹ Dihobasi si Jakob ma sude sinadongannia lalu kehe ma ia tu Berseba laho pasahatkon haul tu Debata na nisomba ni si Ishak amangnia i.

² Mandok hata do Debata tusia di bagasan parnidaan di sada borngin jana pio-pio ma tusia, “Jakob, Jakob!” ninna. “Olo Tuhan,” ning ia mangalusi.

³ “Au do Debata, Debata na nisomba ni amangmu,” ninna. “Ulang pola mabiar ho kehe tu Mesir. BaenonKu ma gabe bangso na godang pomparanmu disi.

⁴ Kehe ma Au tu Mesir rap dohot ho, jana boanonKu ma pomparanmi mangulahi tu luat on. Di lambungmu do si Josep muda dumpang ma hatihana tutuponmu matamu.”

⁵ Jadi kehe ma si Jakob sian Berseba. Ditolong angka anaknia i ma si Jakob, angka ripe ni halahi dohot angka dakdanak ni halahi na menek-menek dope laho manaek tu angka kareta na nitongos ni raja ni Mesir i.

⁶ Dioban halahi muse do angka pahan-pahanan dohot sude barang-barang na dapot ni halahi di Kanaan, jadi kehe ma halahi tu Mesir. Dioban si Jakob ma sude pomparannia, i ma

⁷ angka pomparannia halaklahi dohot dadaboru.

⁸ Angka on ma pomparan ni si Jakob na dohot tu Mesir i:

⁹ Si Ruben anaknia siangkaan; angka dakdanaknia ma: Si Hanokh, si Palu, si Hesron dohot si Karmi.

¹⁰ Si Simeon; angka dakdanaknia: Si Jemuel, si Jamin, si Ohad, si Jakin, si Zohar dohot si Saul tubu ni sada boru Kanaan.

¹¹ Si Levi; angka dakdanaknia: Si Gerson, si Kehat dohot si Merari.

¹² Si Juda; dakdanaknia: Si Sela, si Peres dohot si Zerah (anak ni si Juda deba nari, i ma mandiang si Er dohot si Onan na mate di Kanaan). Dakdanak ni si Peres: Si Hesron dohot si Hamul.

¹³ Si Isakar; dakdanaknia: Si Tola, si Pua, si Job dohot si Simron.

¹⁴ Si Zebulon; dakdanaknia: Si Sered, si Elon dohot si Jahleel.

¹⁵ I ma sude dakdanak ni si Jakob na nitubuhon ni si Lea dompak di Mesopotamia tamba ni borunia na margoar si Dina. Jadi pungu ma tolu pulu tolu halak sude pomparan ni si Jakob sian si Lea.

¹⁶ Si Gad; dakdanaknia: Si Zifion, si Hagi, si Suni, si Esbon, si Eri, si Arodi dohot si Areli.

¹⁷ Si Aser; dakdanaknia: Si Jimna, si Jiswa, si Jiswi dohot si Beria bope si Serah iboto ni halahi. Anak ni si Beria, i ma si Heber dohot si Malkiel.

¹⁸ Na onom bolas i ma pomparan ni si Jakob na nitubuhon ni si Zilpa, i ma hatoban dadaboru na nipasahat ni si Laban tu si Lea borunia i.

¹⁹ Dua do anggo anak na nitubuhon ni si Rahel, ripe ni si Jakob i, i ma si Josep dohot si Benyamin.

²⁰ Di Mesir, adong ma dua anak ni si Josep, i ma si Manase dohot si Efraim na nitubuhon ni si Asnat boru ni si Potifera, malim na di Heliopolis.

²¹ Si Benyamin; dakdanaknia: Si Bela, si Beker, si Asbel, si Gera, si Naaman, si Ehi, si Ros, si Mupim, si Hupim dohot si Ared.

²² Na opat bolas i ma pomparan ni si Jakob sian si Rahel.

²³ Si Dan dohot si Husim anaknia.

²⁴ Si Naftali; angka dakdanaknia: Si Jahseel, si Guni, si Jeser dohot si Silem.

²⁵ Na pitu halak i ma pomparan ni si Jakob sian si Bilha, naposo dadaboru na nipasahat ni si Laban tu si Rahel, borunia i.

²⁶ Onom pulu onom halak ma sude pomparan ni si Jakob na kehe tu Mesir, nada dietong dope disi angka ripe ni dakdanaknia.

²⁷ Dua dakdanak ni si Josep na sorang di Mesir; gabe pungu ma sude pomparan ni si Jakob na lalu tu Mesir pitu pulu halak.

Di Mesir ma si Jakob dohot angka dakdanaknia

²⁸ Disuru si Jakob ma si Juda parjolo anso didokkon ia si Josep mangalo-alo amangnia i di Gosen. Dung lalu halahi di Gosen,

²⁹ ditengget si Josep ma karetania tu Gosen laho mangalo-alo amangnia. Di na marsuo halahi, dihaol si Josep ma amangnia i, tangis ma ia lolot.

³⁰ Didok si Jakob ma tu si Josep, “Saonnari rade ma au mate, dibaen madung huida ho jana madung huboto na mangolu dope ho.”

³¹ Jadi didok si Josep ma tu angka dongan saamania i dohot tu angka kahangginia i sude, “Angkon kehe dope au paboahon tu raja i na dung ro sude kahanggingku dohot sisolkotku na maringanan di tano Kanaan.

³² Dokkononku ma tu raja i, parmahan biri-biri, lombu, do hamu, jana dioban hamu do sude pahan-pahananmunu i dohot sude sinadonganmunu.

³³ Jadi muda dipiohon raja i hamu jana disapai karejomunu,

³⁴ dok hamu ma tu raja i, na somal marmahan hamu sian na menek laing songon ompumunu. Jadi anso disuru ia hamu maringanan di tano Gosen.” Didok si Josep pe songon i, hara ni na so ra do halak Mesir mardongan dohot angka parmahan.