PAMUNGKAAN 32 - BIBEL JAMITA NA DENGGAN

Marhobas ma si Jakob laho marsuo dohot si Esau

¹ Dipatorus si Jakob ma pardalanannia. Jadi ro ma sanga na piga surusuruan i mandapotkon ia.

² Di na niida ni si Jakob angka surusuruan i, didok ia ma, “On ma parbandaran ni Debata.” Jadi digoari ia ma inganan i, Mahanaim.

³ Dung i disuru si Jakob ma piga-piga halak suruan na mardalan manjoloi ia tu Luat Edom laho mandapotkon si Esau angkangnia i.

⁴ Didok si Jakob ma tu halahi, “Songon on ma dokkon hamu tu tuanku si Esau, ‘Si Jakob do au, naposomi na maringanan rap dohot si Laban na salolotna on.

⁵ Saonnari adong do lombungku, halode, biri-biri, hambeng dohot angka naposo bage. Na paboahon ma au tu tuanku mardongan arop ni roha, jop roha ni tuanku.’ ”

⁶ Di na mulak angka suruan i mangulahi mandapotkon si Jakob, didok halahi ma, “Madung hami topot si Esau angkangmi, jana saonnari di tonga dalan ma i ro tuson anso marsuo dohot ho. Dioban ia do opat ratus halak paranganna.”

⁷ Umbege i gabe mabiar ma si Jakob jana gamang ma ia. Jadi dibagi ia ma angka halak na rap dohot ia gabe dua rombongan; songon i muse angka biri-birinia, hambengnia, lombu dohot untonia.

⁸ Ning rohania, “Muda pala ro si Esau jana diserang ia rombongan parjolo, betak sanga dope rombongan na paduahon paluahon dirina.”

⁹ Dung i martangiang ma si Jakob, “O, Debata na nisomba ni daompung si Abraham, jana na nisomba ni damang si Ishak, tangihon ma au! Ho do na marsuru au ale Tuhan, anso mulak au mangulahi tu luatku dohot tu angka koum sisolkotku. Jana dijanjihon Ho do na aturonMu sude angka na denggan di au.

¹⁰ Nada patut au manjagit sude holong ni roha dohot haburjuon na dung nipatuduhonMi tu au di na kehe au manaripari Batang aek Jordan, nada maroban bagi aha au asing sian tungkotku. Saonnari ro au mangulahi rap dohot na dua rombongan on.

¹¹ Na mangido ma au sian situtu ni rohangku, palua ma au sian tangan ni angkangku si Esau. Mabiar do au – mabiar betak sai ro ia manyerang lalu mangabiskon hami sude, bope dadaboru dohot dakdanak.

¹² Ingot ma na dung marjanji Ho, paboa na aturonMu do sude denggan di au jana lehenonMu tu au bahat pomparan. Sahalak pe nada tarbaen mangetongsa hara ni bahatna songon horsik na di topi ni laut.”

^13-15 Dung marborngin disi, dibuat si Jakob ma deba sian angka pahan-pahanannia i silehenonnia silua tu si Esau angkangnia i. Angka on ma siluania i: Dua ratus hambeng boru-boru, dua pulu hambeng jantan, dua ratus biri-biri boru-boru, dua pulu biri-biri jantan, tolu pulu unto panusuan dohot angka anakna, opat pulu lombu boru-boru sampulu lombu jantan, dohot dua pulu halode boru-boru dohot sampulu halode jantan.

¹⁶ Dibagi-bagi ia ma i marhulanan-hulanan, jana ganop hulanan dipasahat ia ma i tu sahalak hatobannia. Didok ia ma tu halahi, “Hamu ma di jolo mardalan, jana marantara ma baen hamu hulanan na parjolo tu na di pudina.”

¹⁷ Diparentahon si Jakob ma tu naposonia na di jolo i, “Muda marsuo hamu dohot daangkang si Esau jana muda disapai ia, ‘Ise tuanmu? Ise nampuna angka pahan-pahanan na di jolomon? Na giot tudia do ho on?’

¹⁸ Angkon alusanmu ma songon on, ‘Nampuna ni si Jakob naposomi do on. Na nitongosnia do on songon somba-sombania tu si Esau, tuannia i. Anggo naposomi si Jakob sandiri mandapoti ma sian pudi.’ ”

^19-20 Tu angka naposonia na paduahon pe, na patoluhon dohot sude na nisurunia mangurus hulanan ni pahan-pahanan i, dilehen ia ma parenta na sarupa. Harana dipikir si Jakob tarelek-elek ia ma si Esau markite-hite somba-somba i, jadi muda marsuo, ro ma si Esau mangampuni ia.

²¹ Jadi hara ni i ma umbaen na parjolo ditongos ia somba-somba i, hape ia sandiri marborngin di bandar do.

Marsiranggut si Jakob di Peniel di topi ni Batang aek Jabok

²² Laing di borngin i tarsunggul ma si Jakob jana ditariparkon ia ma ripenia na dua i dohot radingnia na dua i dohot anaknia na sabolas i di Batang aek Jabok.

²³ Dung ditariparkon ia halahi, dipataripar ia muse ma sude sinadongannia.

²⁴ Tapi anggo ia sandiri laing di parbandaran i dope sasada ia. Jadi ro ma sada bayo marsiranggut dohot si Jakob lopus marayak torang ari.

²⁵ Dung diida bayo na ro i, na so tarbaen monang ia na marsiranggut i, dipukul ia ma soit ni si Jakob jabat tarkiet soitna i.

²⁶ Jadi ning bayo i ma, “Padiar ma kehe au; santongkin nari torang ma ari.” Dialusi si Jakob ma, “Nada hupaloas ho kehe anggo so jolo dipasupasu ho au.”

²⁷ “Ise dehe lakna goarmu?” ning bayo i manyapai. “Si Jakob do,” ning ia.

²⁸ Didok bayo i, “Nada si Jakob be goarmu. Madung marsiranggut ho mangalo Debata dohot mangalo jolma jana monang do ho; antong si Israel noma goarmu.”

²⁹ Didok si Jakob ma, “Paboa ma da goarmu.” Tapi nada dialusi bayo i, “Nada adong gunana disapai ho sanga ise goarku!” Jadi dipasupasu ia ma si Jakob.

³⁰ Jadi didok si Jakob ma, “Madung marsuo bohi au dohot Debata, hape laing mangolu dope au.” Jadi dibaen ia goar ni inganan i, Peniel.

³¹ Di na bincar mataniari, ditadingkon si Jakob ma Peniel, gabe tengka ma ia hara ni na tarkiet soitnia i.

³² Lopus saonnari pe anggo pomparan ni si Israel na so unjung do dipangan halahi juhut sian soit ni binatang hara ni na hona hantam i si Jakob di soitnia i.