PAMUNGKAAN 23 - BIBEL JAMITA NA DENGGAN

Jumolo ma si Sara jana ditobusi si Abraham tano baen kuburan

¹ Marumur do si Sara saratus dua pulu pitu taon.

² Di Hebron na di tano Kanaan do marujung ngolunia, jana diandungi si Abraham ma hamamatenia i.

³ Dung i ditadingkon si Abraham ma bangke ni ripenia i, kehe ma ia mandapotkon halak Het jana didok ia ma,

⁴ “Halak na ro do au di tonga-tongamunu on; loas hamu ma hutobusi tanomunu on anso tarkuburkon au dongan saripengki.”

^5-6 Dialusi halahi ma, “Hami parsangapi do da ho songon pamimpinnami na gogo; jadi tu tano kuburan na dumenggan na adong di hami on ma kuburkon dongan sabagasmi. Sonang do rohanami sude paradehon kuburan di dongan sabagasmi.”

⁷ Dung i manungkap ma si Abraham di jolo ni halahi,

⁸ jana didok ia ma, “Muda tumbuk do di rohamunu dison hukuburkon dongan saripengki, mangido tolong ma anso dokkon hamu tu si Efron anak ni si Zohar i,

⁹ anso digadis ia tu au Liang Mahpela, i ma na di duru ni ladangnia i. Pangidohon hamu ma dison di adopanmunu, digadis ia tano i. Hugarari pe sude argana i, anso gabe au nampunasa baen tano kuburan.”

¹⁰ Jadi laing dohot do si Efron rap dohot angka halak Het i juguk di inganan pangkataion na di horbangan ni kota i. Jadi sude ma halak na adong disi umbege alusnia,

¹¹ “Saonnari angka dongan sabangsongkon ma manyaksihon, hulehen ma di ho ladang i dohot liang na disi, anso tarkuburkon ho dongan sabagasmi,” ning ia.

¹² Gabe manungkap ma si Abraham di adopan ni halak Het i,

¹³ jana sude do halahi umbege hatania i tu si Efron, “Hupangido dohot sangap, tangihon ma jolo. Giotku nian hutobusi ma sude ladang i. Jagit ma gararna, anso hukuburkon dongan sabagaski disi.”

¹⁴ Dialusi si Efron ma,

¹⁵ “Tano na saotik, na mararga hum opat ratus hepeng perak – aha ma he arti ni i di hita na dua? Kuburkon sajo ma dongan sabagasmi disi.”

¹⁶ Tumbuk ma arga i di roha ni si Abraham, dietong ia ma hepeng perak i mangihutkon timbangan na somal dipake saudagar. Dung i digarar ia ma i tu si Efron di jolo ni angka pamimpin ni halak Het i.

¹⁷ Songon i ma dalanna umbaen na gabe si Abraham nampuna ladang ni si Efron na di Mahpela sabola Habincaran ni Mamre. Ladang dohot liang na disi dohot angka suan-suanan na adong disi lopus tu topi ni ladang, sai ma tano i sude.

¹⁸ Sude do halak Het na marlagut i disi mangoku tano i gabe nampuna ni si Abraham.

¹⁹ Dung i dikuburkon si Abraham ma si Sara dongan saripenia i di bagasan liang i di tano Kanaan.

²⁰ Songon i ma pangalahona ladang ni halak Het sinangkin dohot liangna i gabe nampuna ni si Abraham gabe tano kuburan.