PAMUNGKAAN 20 - BIBEL JAMITA NA DENGGAN

Si Abraham dohot si Abimelek

¹ Bungkas ma si Abraham sian Mamre tu sabola Selatan ni tano Kanaan, jana disi noma ia maringanan di antara ni Kades dohot Sur. Dung adong sadia honok di na niinganannia Gerar,

² didok ia ma ibotonia si Sara dongan saripenia i. Jadi gabe disuru si Abimelek raja na sian Gerar i ma obanon si Sara tusia.

³ Di sada borngin dipatidahon Debata ma diriNia tu raja i di bagasan nipi jana didok ma, “Mate noma ho, angke dibuat ho do antong dadaboru i na dung adong halaklahina.”

⁴ Tapi nada jabat dope rap modom si Abimelek dohot si Sara, gabe didok raja i ma, “Nada au da Tuhan na sala! AbiskononMu ma he au dohot bangsongku?

⁵ Na nidok ni si Abraham sandiri do ibotonia anakboru i, jana songon i muse do pandok ni anakboru i. Sian ias ni rohangku do hubaen songon i, jana nanggo adong hubaen na sala.”

⁶ Jadi dialusi Debata ma di bagasan nipi, “Tutu do i, Huboto do sian roha na ias do dibaen ho songon i; hara ni i ma umbaen na Husundati ho mardosa maradopkon Au, jana nada Hupadiar ho manjama dadaboru i.

⁷ Tapi saonnari, paulak ma anakboru i tu halaklahina. Panurirang do halaklahinia i, jana tangiangkononnia do ho anso ulang mate. Tapi muda nada dipaulak ho, ingot ma, mate ma ho dohot sude rayatmi!”

⁸ Ancogotna i manyogot, dipiohon si Abimelek ma sude pagawenia na di bagas godang i jana dicaritohon ia ma tu halahi, sanga aha na masa i; jadi gabe mabiar situtu ma halahi.

⁹ Dung i dipiohon si Abimelek ma si Abraham laho manyapai. Ning ia ma, “Na mambaen bia dehe ho tu hami? Aha lakna salangku tu ho, umbaen na ro siluluton on tu au dohot tu harajaanku hara ni ho? Nada di dalanna baenonmu tu au songon i.

¹⁰ Biasi pola baenonmu songon i?”

¹¹ Dialusi si Abraham ma, “Na huambang do na so adong na mabiar mida Debata dison, jana ning rohangku bunuon ni halak na dison ma au laho mambuat dongan saripengki.

¹² Tutu do da anggingku anakboru i. Boru ni damang do i, tapi asing inanami, jadi hualap ia di au.

¹³ Jadi di na nisuru ni Debata au manadingkon bagas ni damang jana kehe tu angka luat na asing hudok ma tu dadaborungki, ‘Angkon patidahononmu do na tutu dihaholongi ho au, dokkon ma tu halak paboa na itomu do au.’ ”

¹⁴ Dung i dipaulak si Abimelek ma si Sara tu si Abraham, jana dipasahat ia dope disia angka hatoban, biri-biri dohot lombu.

¹⁵ Didok raja i ma tu si Abraham, “On ma sude tanongku, pili ma sanga dia por ni rohamu ingananmu.”

¹⁶ Jadi didok raja i ma tu si Sara, “Lehenonku ma di ho itomi, hepeng perak saribu, songon tanda paboa na tutu na so marsala ho; jana botoon ni sude halak ma i.”

^17-18 Gabe so maruntungan sude dadaboru na di bagas godang ni si Abimelek i dibaen Debata hara ni na masa tu si Sara, ripe ni si Abraham i. Jadi ditangiangkon si Abraham ma si Abimelek tu Debata, jana dipamalum Debata ma si Abimelek, dongan saripe dohot angka hatobanna dadaboru, gabe mulak ma margogo halahi laho mardakdanak.