PAMUNGKAAN 17 - BIBEL JAMITA NA DENGGAN

Sunat i ma tanda ni parjanjian

¹ Di na marumur si Abram sambilan pulu sambilan taon, dipatidahon Tuhan ma diriNa tusia jana didok ma, “Au do Debata Na Gumogo. Oloi ma Au jana patulus tongtong sanga aha hagiotKu.

² PahotonKu ma parjanjian dohot ho, jana lehenonKu ma bahat pomparanmu.”

³ Gabe manungkap ma si Abram, dung i didok Debata ma,

⁴ “Hubaen do parjanjian on dohot ho: Marjanji ma Au, gabe ompu ni bahat bangso ma ho.

⁵ Nada be si Abram goarmu tapi si Abraham noma, angke madung Hupabangkit ho gabe ompu ni bahat bangso.

⁶ BaenonKu ma bahat pomparanmu, jana deba sian halahi gabe angka raja. Songon i ma bahat ni pomparanmu, lopus gabe bangso na bahat halahi.

⁷ Paingot-ingotonKu do janjingKu na tu ho dohot tu pomparanmu marsundut-sundut jana hot do janjingKu salolot-lolotna. Au ma gabe Debatamu jana Debata ni pomparanmu.

⁸ LehenonKu ma di ho dohot di pomparanmu, i ma tano na niingananmon saonnari songon paisolat. Sude tano Kanaan gabe pomparanmu ma nampuna i ro di salolot-lolotna jana Au ma gabe Debata ni halahi.”

⁹ Didok Debata dope tu si Abraham, “Ho pe angkon laing rade do maniop parjanjian on, bope ho bope pomparanmu marsundut-sundut.

¹⁰ Angkon ra do ho dohot pomparanmu sudena pasunatkon ganop anak halaklahi na adong di hamu.

^11-12 Mamungka saonnari angkon pasunatkononmu ma ganop anak halaklahi na baru sorang na marumur salapan ari, dohot do disi angka hatoban na sorang di bagasmu dohot angka hatoban na nitobusanmu sian halak na asing. Sunat i ma na gabe tanda na tarida paboa na hot parjanjian i antara ho dohot Au.

¹³ Ganop halak na sorang di bagasmu dohot halak na nitobusanmu dohot hepeng angkon disunat, jana di dagingmu do parjanjianKu salolot ni lolotna.

¹⁴ Ganop halaklahi na so nisunat nada masuk be i gabe bangsongKu angke nada togu ditiop ia parjanjian i.”

¹⁵ Dung i didok Debata dope tu si Abraham, “Ulang be si Sarai piohon goar ni ripemi, mamungka saonnari si Sara noma goarnia.

¹⁶ PasupasuonKu ma ia jana tubuhononnia ma sada anak halaklahi na giot lehenonKu di ho. Ligi da, pasupasuonKu ma si Sara, jana gabe ina ni angka bangso ma ia. Sian angka pomparannia, adong ma na gabe angka raja.”

¹⁷ Gabe manungkap ma si Abraham, tapi mikim do ia di na nipikirnia, “Mungkin do lakna sada halaklahi na marumur saratus taon mardakdanak? Mungkin dope ulaning adong anak ni si Sara na marumur sambilan pulu taon i?”

¹⁸ Gabe disapai ia ma tu Debata, “Biasi lakna nada si Ismael na gabe panean di au?”

¹⁹ Tapi didok Debata ma, “Nada ale. Tubuhonon ni si Sara ripemi do anak halaklahi, jana baen ma goarna si Ishak. Torus do tioponKu parjanjianKu tu dakdanak i dohot tu pomparanmu salolot-lolotna.

²⁰ Madung Hubege pangidoanmi taringot tu si Ismael, jadi hara ni i pasupasuonKu do ia jana lehenonKu pomparan na bahat tusia. Gabe ompu ni dua bolas raja ma ia, jana baenonKu ma pomparannia gabe sada bangso na godang.

²¹ Tapi anggo parjanjianKi, dohot si Ishak do pudunonKu, i ma anakmu na giot tubuhonon ni si Sara taon naro tarsongon on ma hatihana.”

²² Dung sidung Debata na mandok hata i tu si Abraham, kehe muse ma Debata manadingkon ia.

²³ Laing di na sadari i dioloi si Abraham ma Debata, dipasunatkon ia ma si Ismael anaknia i dohot sude halaklahi na di bagasnia, dohot angka hatoban na sorang di bagasnia bope na nitobusannia.

²⁴ Marumur sambilan pulu sambilan taon ma si Abraham di na marsunat i

²⁵ jana si Ismael, marumur tolu bolas taon

²⁶ di na sadari i do halahi disunat,

²⁷ rap dohot sude hatoban ni si Abraham.