PAMUNGKAAN 16 - BIBEL JAMITA NA DENGGAN

Si Hagar dohot si Ismael

¹ Laing so maruntungan dope anggo si Sarai, dongan saripe ni si Abram i. Tapi adong do sahalak hatobannia halak Mesir, bujing-bujing dope na margoar si Hagar.

² Jadi didok si Sarai ma tu si Abram, “Lakna na so tumbuk do roha ni Tuhan manubuhon dakdanak au. Hara ni i dumenggan ma da rap modom ho dohot hatobanki. Betak na tartubuhon ia do anak di au.” Satuju do si Abram di usul ni si Sarai i.

³ Songon i ma pangalahona dilehen si Sarai si Hagar tu si Abram anso dibaen gabe rading. (Pangalaho on tarjadi dung sampulu taon si Abram maringanan di Kanaan.)

⁴ Jadi campur ma si Abram dohot si Hagar, gabe denggan ma pamatang ni anakboru i. Di na tarboto di si Hagar na denggan pamatangnia, gabe manyombong ma ia jana layas rohania mida si Sarai.

⁵ Jadi didok si Sarai ma tu si Abram, “Madung hulehen si Hagar pakeonmu, jana mamungka diboto ia na dung denggan pamatangnia layas ma rohania mida au. Ho do na sala disi. Sai Tuhan ma na paujungkon parkaro on antara ho dohot au.”

⁶ Dialusi si Abram ma, “Antong denggan. Hatobanmu jana ditoru ni kuasomu do i; baen ma roha-rohamu tusia.” Jadi dibaen si Sarai ma roha-rohania tu si Hagar, hara ni kejamnia gabe lari ma si Hagar.

⁷ Ro ma surusuruan ni Tuhan mandapotkon ia di lambung ni mual ni aek di parhorsihan, di dalan laho tu Parhorsihan Sur.

⁸ Didok surusuruan i ma, “O Hagar, hatoban ni si Sarai, na sian dia do ho ro jana na giot tu dia do ho?” Dialusi si Hagar ma, “Na lari do au sian nampuna au.”

⁹ Didok surusuruan i ma, “Mulak ma ho tusia, jana paunduk ma rohamu mangoloi ia.”

¹⁰ Didok surusuruan i muse dope, “Lehenonku ma di ho anak ro di pahompumu na songon i bahat, jabat umpe sahalak tarbaen mangetongsa.

¹¹ Tubuhononmu ma sada anak halaklahi jana goaronmu ma ia si Ismael, angke madung ditangihon Tuhan andung-andungmi.

¹² Tapi songon halode riar do ngolu ni anakmi, maralo do ia sanga tu ise jana ganop halak maralo tusia, sirang do ia sian sude angka koum sisolkotnia.”

¹³ Sapa-sapa ma si Hagar di bagasan rohania, “Tutu do ulaning huida Debata na mamparrohahon au?” Jadi gabe digoari ia ma Tuhan na mandok hata i tusia, “Debata Na Mamparrohahon”.

¹⁴ I ma dalanna umbaen na nigoaran ni halak sumur na di holang-holang ni Kades dohot Bered, “Sumur ni Na Mangolu Na Mamparrohahon Au”.

¹⁵ Jadi sorang ma anak ni si Hagar, jadi digoari si Abram amangnia i ma dakdanak i si Ismael.

¹⁶ Marumur salapan pulu onom taon ma si Abram hatiha i.