PAMUNGKAAN 15 - BIBEL JAMITA NA DENGGAN

Parjanjian ni Tuhan dohot si Abram

¹ Dung i dijagit si Abram ma sada halumbaan, jana dibege ia ma Tuhan mandok tusia, “Ulang ho mabiar Abram, Au do mangondingi ho sian parmaraan, jana lehenonKu ma tu ho upa bahat.”

² Tapi didokkon si Abram ma, “Iale Tuhan Debata, aha ma he guna ni upaMi di au, anggo so na adong anakniba? Hum si Elieser halak Damaskus i ma na manean au.

³ So na adong anak dilehen Ho di iba, gabe sahalak sian hatoban i ma na manean sinadonganki.”

⁴ Dung i dibege si Abram ma mangulahi hata ni Tuhan tusia, “Nanggo hatobanMi na manean sinadonganmi, tapi anakmu sandiri do na gabe panean di ho.”

⁵ Dioban Ia ma si Abram tu ruar jana didok Ia ma tusia, “Tatap ma tu langit, jana etongi ma jolo angka bintang i: Songon i ma bahat ni pomparanmu sogot.”

⁶ Porsaya do si Abram tu Tuhan, jana dietong ma i disia gabe hatigoran.

⁷ Dung i didok Tuhan ma tusia, “Au ma da Tuhan na mangiring-iring ho ruar sian tano Ur na di Babilonia, anso Hulehen luat on gabe tanomu.”

⁸ Tapi disapai si Abram ma, “Iale Tuhan Debata, bia ma hubaen mamboto paboa na giot au nampuna tano i?”

⁹ Ninna Tuhan mangalusi, “Buat ma di Au sada lombu, sada hambeng boru-boru dohot sada hambeng jantan na marumur tolu taon dohot sada balam dohot sada darapati.”

¹⁰ Dibuat si Abram ma angka binatang i di Debata; dibola dua ia ma lombu i dohot hambeng na dua i jadi dipayakkon ia ma bola-bolana i paadop-adop dua baris. Tapi anggo unggas i nada dibola dua ia.

¹¹ Dung i marsonggopan ma angka unggas sipangan bangke di juhut ni angka binatang i, tapi diusir si Abram do.

¹² Di na mamungka lusut mataniari, tarpodom ma si Abram sinok. Dung i gabe digohi biar ma pangkilalaan ni si Abram.

¹³ Didok Tuhan ma tusia, “Gabe paisolat ma pomparanmu di luat na asing; gabe hatoban ma halahi disi jana taonon ni halahi ma na hancit opat ratus taon honokna.

¹⁴ Tapi uhumonKu do bangso na marhatobankon pomparanmu; jana di na manadingkon luat i pomparanmu, obanon ni halahi ma bahat arta sinadongan.

¹⁵ Ho sandiri pe, jagitonmu ma umur na ginjang, sonang ma parmatemu torus dikuburkon.

¹⁶ Dung opat sundut pe anso mulak mangulahi pomparanmu tuson, angke nada paorotonKu dope halak Amori painte so santak jahat ni halahi anso tumbuk uhumon.”

¹⁷ Dung borngin tompu ma tarida sada dalihan na martimus dohot obor na gara, na mamolus di antara ni bola-bolaan ni juhut i.

¹⁸ Laing di hatiha i ma dibaen Tuhan parjanjian dohot si Abram. Ninna Tuhan ma, “Marjanji ma Au laho mangalehen tano on sudena di pomparanmu, mamungka sian batas ni Luat Mesir lopus tu Batang aek Efrat,

¹⁹ masuk ma disi tano ni halak Keni, Kenas, Kadmon,

²⁰ Het, Peris, Refaim,

²¹ Amori, Kanaan, Girgasi dohot Jebus.”