PAMUNGKAAN 11 - BIBEL JAMITA NA DENGGAN

Tugu na di kota Babel

¹ Di mulana hum sada do hata ni angka jolma na di tano on, jana sarupa do hata ni halahi sude.

² Di na mardalan halahi mamolus-molus di sabola Habincaran, lalu ma halahi tu tano na hornop di Babilonia. Lalu disi ma halahi maringanan.

³ Marsidokkonan ma halahi na sada tu donganna, “Tole ma tabaen batu bata, tatutung ma i lopus pir.” Songon i ma dalanna gabe adong batu bata di halahi sipakeon laho pajongjong bangunan dohot na gabe sipakeon laho palohotkonsa.

⁴ Didok halahi ma, “Tabaen ma sada kota dohot sada tugu lopus tu langit puncutna, anso tarbonggal goarta sandiri jana anso ulang marserak hita di tano on.”

⁵ Jadi mijur ma Tuhan laho mangaligi kota dohot tugu na nipajongjong ni jolma i.

⁶ Jadi didok Ia ma, “Sisada bangso dohot sisada hata do halak on, jana on dope parmulaan ni angka tahi ni halahi. Anggo pola tongkin nari tarbaen halahi ma sanga aha giot ni halahi.

⁷ Dumenggan ma mijur Hita jana Tapasarsar ma hata ni halahi anso ulang be marsiastuan hata ni halahi be.”

⁸ Songon i ma panyarsar ni Tuhan di halahi di tano on sude, jana mantak ma halahi na pajongjong kota i.

⁹ Dibaen ma goar ni kota i Babel, harana disi ma disegohon Tuhan hata ni sude bangso, jana sian i ma halahi marsitondong dalanna be tu sude portibi on.

Pomparan ni si Sem

¹⁰ On ma pomparan ni si Sem. Dua taon dung salpu aek na oto, di na marumur si Sem 100 taon, adong ma anaknia na margoar si Arpaksad.

¹¹ Dung salpu i tamba dope umurnia 500 taon nari, jana adong dope angka anaknia na asing.

¹² Di na marumur si Arpaksad 35 taon, adong ma anaknia na margoar si Selah.

¹³ Dung i tamba dope umur ni si Arpaksad 403 taon nari jana adong dope dakdanaknia na asing.

¹⁴ Di na marumur si Selah 30 taon, adong ma anaknia i ma na margoar si Eber.

¹⁵ Dung i tamba dope umur ni si Selah 403 taon nari, jana adong dope angka dakdanaknia na asing.

¹⁶ Di na marumur si Eber 34 taon, adong ma anaknia, i ma na margoar si Peleg.

¹⁷ Dung i martamba dope umur ni si Eber 430 taon nari, jana adong dope angka dakdanaknia na asing.

¹⁸ Di na marumur si Peleg 30 taon, adong ma anaknia na margoar si Rehu.

¹⁹ Dung i martamba dope umur ni si Peleg 209 taon nari jana adong dope angka dakdanaknia na asing.

²⁰ Di na marumur si Rehu 32 taon, adong ma anaknia na margoar si Serug.

²¹ Dung i tamba dope umur ni si Rehu 207 taon nari, jana adong dope angka dakdanaknia na asing.

²² Di na marumur si Serug 30 taon, adong ma anaknia na margoar si Nahor.

²³ Dung i tamba dope umur ni si Serug 200 taon nari, jana adong dope angka dakdanaknia na asing.

²⁴ Di na marumur si Nahor 29 taon, adong ma anaknia na margoar si Terah.

²⁵ Dung i tamba dope umur ni si Nahor 119 taon nari jana adong dope angka dakdanaknia na asing.

²⁶ Dung marumur si Terah 70 taon, adong ma anaknia tolu halak i ma si Abram, si Nahor dohot si Haran.

Pomparan ni si Terah

²⁷ On ma pomparan ni si Terah: Si Terah ma amang ni si Abram, si Nahor dohot si Haran. Adong ma anak ni si Haran si Lot goarna.

²⁸ Marujung ma ngolu ni si Haran di kota hatubuanna, i ma di Ur na di Babilonia. Hape mangolu dope hatiha i amangnia.

²⁹ Dialap si Abram ma si Sarai gabe dongan saripena, jana si Nahor mambuat si Milka boru ni si Haran. Adong dope angka dakdanak ni si Haran na asing na margoar si Jiska.

³⁰ Tapi nada maruntungan si Sarai.

³¹ Dioban si Terah ma si Abram anakna i dohot si Lot pahompuna, dohot si Sarai parumaennia i, jadi rap kehe ma halahi manadingkon kota Ur na di Babilonia. Maksudnia giot kehe tu Kanaan do. Tapi dung lalu di Haran, gabe disi noma halahi maringanan.

³² Jana disi noma marujung ngolu ni si Terah di na marumur ia 205 taon.