PAMUNGKAAN 10 - BIBEL JAMITA NA DENGGAN

Pomparan ni angka anak ni si Noak

¹ On ma pomparan ni angka anak ni si Noak, i ma si Sem, si Ham dohot si Jafet. Dung salpu aek na oto i, adong ma angka anak ni halahi na tolu.

² Angka on ma anak ni si Jafet: Si Gomer, si Magog, si Madai, si Jawan, si Tubal, si Mesek dohot si Tiras. Halahi ma na gabe ompu di angka bangso na nigoaran mangihutkon goar ni halahi.

³ Pomparan ni si Gomer ma bangso Arkenas, bangso Rifat dohot bangso Togarma.

⁴ Pomparan ni si Jawan ma bangso Elisa, Spanyol, Siprus dohot Rodes.

⁵ Halahi ma na gabe ompu ni angka bangso na maringanan di topi ni laut dohot di angka pulo-pulo. Pomparan ni si Jafet ma sudena i jana marsiingani tanona be do halahi marguru tu marga ni halahi. Jana adong be do hatana.

⁶ Angka anak ni si Ham i, i ma si Kus, Mesir, Libia dohot Kanaan i ma na gabe ompu ni angka bangso na nigoar mangihutkon goar ni halahi.

⁷ Pomparan ni si Kus ma angka bangso Seba, Hawila, Sabta, Raema dohot Sabtekha. Pomparan ni si Raema ma bangso Seba dohot Dedan.

⁸ Adong do anak ni si Kus na margoar si Nimrod, i ma na gabe raja parjolo na gabe ulubalang na barani di tano on.

⁹ Hara ni pangurupi ni Tuhan gabe parburu godang ma ia, jana hara ni i ma umbaen na somal didok halak, “Sai dipatumbuk Tuhan ma ho gabe parburu godang songon si Nimrod.”

¹⁰ Anggo di mulana lalu do tu Babel, Ereh dohot tu Akad kuasonia. Di Babilonia do na tolu i.

¹¹ Kehe ma ia sian luat i tu Asur, dipajongjong ia ma kota Ninive, Rehobot-Ir, Kalah,

¹² dohot Resen, i ma na di holang-kolang ni Ninive dohot kota Kalah na godang i.

¹³ Pomparan ni si Mesir ma bangso Lidia, Anamim, Lehabim, Naftuhim,

¹⁴ Petrusim, Kaslukhim, dohot Kaftorim. Angka i ma ompu ni bangso Pilistin.

¹⁵ Angka anak ni si Kanaan, i ma si Sidon siangkaan dohot si Het, i ma ompu ni angka bangso na nigoaran mangihutkon goar ni halahi.

¹⁶ Laing di Kanaan muse do ompu ni halak Jebusi, halak Amori dohot halak Gergasi,

¹⁷ halak Hewi, halak Arki, halak Sini,

¹⁸ halak Awardi, halak Semari dohot halak Hamati. Marserak do lalu tu na dao angka marga ni bangso Kanaan,

¹⁹ jabat do, mangararati batas ni Kanaan mamungka sian Sidon lopus tu sabola Selatan donok tu Gerar, di lambung ni Gasa, dohot tu sabola Habincaran marayak Sodom, Gomora, Admah dohot Zeboim; di lambung ni Lasa.

²⁰ I ma pomparan ni si Ham, na maringanan di tanona be do mangihutkon marga ni halahi. Adong be do hata ni halahi.

²¹ Si Sem, angkang ni si Jafet ma ompu ni sude bangso Ibrani.

²² Angka anak ni si Sem i ma si Elam, si Asur, si Arpaksad, si Lot dohot si Aram. Halahi ma ompu ni angka bangso na nigoaran mangihutkon goar ni halahi.

²³ Pomparan ni si Aram ma angka halak Us, Hul, Geter dohot Mas.

²⁴ Si Arpaksad ma amang ni si Selah. Jana si Selah ma amang ni si Eber.

²⁵ Dua anak ni si Eber; sada ma i na margoar si Peleg, harana di hatihania ma tarbagi-bagi angka bangso na di tano on; na paduahon i ma na margoar si Joktan.

²⁶ Pomparan ni si Joktan ma angka bangso Almodad, Selep, Hasar-Mawet dohot Jerah,

²⁷ Hadoram, Usal, Dikla,

²⁸ Obal, Abimael, Seba,

²⁹ Ofir, Hawila dohot Jobab. Pomparan ni Joktan ma i sude.

³⁰ Tano inganan ni halahi mulai sian Mesa lalu tu Sefar, i ma luat na mardolok-dolok di sabola Habincaran.

³¹ I ma pomparan ni si Sem, na maringanan di tano na be do i mangihutkon marga ni halahi be. Adong be do hata ni halahi.

³² I ma angka pomparan ni si Noak mangihutkon partubuna be. Dung salpu aek na oto i, sude bangso na di tano on pomparan ni angka anak ni si Noak noma.