NEHEMIA 3 - BIBEL JAMITA NA DENGGAN

Padenggankon tembok ni Jerusalem

¹ Jana markobas ma Malim Godang Elyasib dohot angka malim, hahaangginia. Dibangun halahi ma muse Pintu Horbangan Biri-biri, mamasang angka pintuna dohot manghapunjungkonsa di Tuhan. Dipadenggan halahi ma tembok i jana dihapunjungkon lopus tu Palas-palas Saratus dohot tu Palas-palas Hananeel.

² Asing ni angka malim i, dipadenggan angka halak on dope tembok ni kota rap dohot angka pintu horbangan maradu angka palas-palasna marjojor songon on: Halak Jeriko. Si Zakur anak ni si Imri.

³ Horong ni si Senaa: Pintu Horbangan Ihan dohot angka balok, angka pintu, angka baut dohot angka palangna.

⁴ Si Meremot anak ni si Uria, jana pahompu ni si Hakos. Si Mesulam anak ni si Berekia jana pahompu ni si Mesesabeel. Si Zadok anak ni si Baana,

⁵ dohot rayat Tekoa. Tapi anggo hatobangan ni kota i nada ra mangkarejohon karejo ni tuanna i.

⁶ Si Joyada anak ni si Paseah dohot si Mesulam anak ni si Besoya: Pintu Horbangan Jesana dohot angka balok, angka pintu, angka baut dohot angka palangna.

⁷ Si Melatya na sian Gibeon dohot si Jadon na sian Meronot. Angka halak Gibeon dohot Mispa: Tembok lopus tu bagas godang ni gubernur Efrat Hasundutan.

⁸ Si Usiel, tukang sere i anak ni si Harhaya. Si Hananya, pambaen miak wangi, dikarejohon halahi ma lalu tu Tembok Na Bidang.

⁹ Si Repaya anak ni si Hur, parkuaso ni satonga distrik Jerusalem.

¹⁰ Si Jedaya anak ni si Harumap: Tembok na di lambung ni bagasnia i sandiri, na padonokdonok dohot si Hatus anak ni si Hasabneya.

¹¹ Si Malkia anak ni si Harim dohot si Hasub anak ni si Pahatmoab: Udut ni tembok sinangkin dohot Palas-palas Parapian.

¹² Si Salum anak ni si Halohes, parkuaso ni satonga distrik Jerusalem na niurupan ni angka borunia.

¹³ Si Hanun dohot halak Zanoah: Pintu Horbangan Lombang dohot angka pintuna, angka baut dohot angka palangna. Songon i muse 440 meter ginjang ni tembok lopus tu Pintu Horbangan Rompak.

¹⁴ Si Malkia anak ni si Rekhab, parkuaso ni distrik Bet-Kerem: Pintu Horbangan Rompak dohot angka pintuna, angka baut dohot angka palangna.

¹⁵ Si Salum anak ni si Kolhose, parkuaso ni distrik Mispa: Pintu Horbangan Mata Mual dohot tarupna, angka pintu, angka baut dohot angka palangna. Dohot muse tembok ni Tobat Selah na di lambung ni taman bagas godang lopus tu tangga-tangga panuatan sian Kota Ni si Daud.

¹⁶ Si Nehemia anak ni si Asbuk, parkuaso ni satonga Bet-Zur: Tembok na lalu tu kuburan ni horong ni si Daud, dohot tobat na nipature, dohot tangsi.

Angka halak Levi na dohot padenggankon tembok

^17-21 Deba nari sian tembok i dohot do halak Levi paudutkon, songon on ma parjojorna: Si Rehum anak ni si Bani. Si Hasabaya, parkuaso ni satonga distrik Kehila. Bagian ni tembok na masuk tu distriknia sandiri. Si Binui anak ni si Henadad, parkuaso ni satonga Distrik Kehila. Si Eser anak ni si Jesua parkuaso ni Mispa: Tembok na sian suhi ni dalan na di jolo ni gudang sinjata. Si Barukh anak ni si Zabai: Tembok na sian suhi ni dalan na sian pintu ni bagas ni Elyasib lopus tu ujung ni bagas i. Si Meremot anak ni si Uria jana pahompu ni Hakos: Bagian ni tembok na sian pintu ni bagas ni si Elyasib lopus tu ujung ni bagas i.

Angka malim na dohot padenggankon tembok i

^22-26 Angka tembok udut ni sinangkin dipadenggan angka malim, songon on ma parjojorna: Angka malim na so sadia dao maringanan sian Jerusalem. Si Benyamin anak ni si Hasub: Tembok na di jolo ni bagas ni halahi. Si Asarya anak ni si Maaseya, anak ni si Ananya: Tembok na di lambung ni bagasnia i. Si Binui anak ni si Henadad: Tembok na sian bagas ni si Asarya lopus tu suhi ni tembok. Si Palal anak ni si Usai: Tembok na sian suhi-suhina i dohot palas-palas ni bagas godang bagian parginjang na di lambung ni alaman panjagoan. Si Pedaya anak ni si Paros: Tembok i lopus tu jolo ni Pintu Horbangan Aek na di sabola Habincaran dohot palas-palas panjagoan ni Bagas Ni Tuhan. (Nada sadia dao sian i adong do sada inganan na margoar Ofel, inganan ni angka parkarejo ni Bagas Ni Tuhan.)

Angka parkarejo na asing

²⁷ Deba sian udut ni tembok i angka halak na marjojor dison ma padenggankon: Rayat ni kota Tekoa: Tembok sian jolo ni palas-palas panjagoan ni Bagas Ni Tuhan lopus tu tembok na di humaliang Opel.

²⁸ Angka malim na maringanan di lambung ni Pintu Horbangan Kudo: Tembok na maradopan dohot bagas ni halahi be sian horbangan i torus tu sabola Utara.

²⁹ Si Zadok anak ni si Imer, si Semaya anak ni si Sekhanya, panjago ni pintu horbangan Timur: Tembok na di jolo ni bagasnia i.

³⁰ Si Hananya anak ni si Selemya dohot si Hanun anak ni si Zalap na paonomkon. Si Mesulam anak ni si Berekia: Tembok na paadop-adop dohot bagasnia.

³¹ Si Malkia, tukang sere i: Tembok na lalu tu asrama ni angka parkarejo dohot bagas ni angka parjagal na di jolo ni Pintu Horbangan Mifkad dohot na lalu tu lambung ni kamar parginjang na di suhi-suhi ni tembok na sabola Timur Laut.

³² Angka tukang sere dohot parboniaga: Bagian ni tembok na parpudi, mamungka sian kamar parginjang na di suhi-suhi ni tembok i lopus tu Pintu Horbangan Biri-biri.