NEHEMIA 13 - BIBEL JAMITA NA DENGGAN

Mangasing diri halak Israel sian halak sileban

¹ Di na manyisehon Uhum Ni si Musa i tu rayat i, dapot ma hatorangan songon on: ‘Na so tola do halak Amon dohot Moab mardomu dohot bangso ni Debata;

² harana taran na mardalan bangso Israel ruar sian Mesir, nada dilehen bangso na dua i sipanganon dohot aek tu bangso i. Diupai halahi dope si Bileam laho mamurai bangso Israel, tapi dipauba Debata burana i gabe pasupasu.’

³ Dung dibege halak Israel songon i, dipabali halahi ma sude halak sileban sian masarakat ni Israel.

Angka pangalaho na imbaru na nipatupa ni si Nehemia

⁴ Painte so i, denggan do pardonganan ni si Elyasib na markarejo mangawasi angka kamar simpanan na di Bagas Ni Tuhan, tu si Tobia.

⁵ Dilehen si Elyasib tu si Tobia sada kamar na godang. Anggo satutuna nian sipakeon na mardohonan do kamar i, i ma panyimpanan ni haul gandum, hamonyan, angka alat-alat sipakeon di Bagas Ni Tuhan, haul na di malim, parsampuluan ni gandum, anggur, miak zetun sibagi-bagihononkon tu angka halak Levi, angka parmusik dohot sijago horbangan ni Bagas Ni Tuhan.

⁶ Di na tarjadi songon i, nada di Jerusalem au, harana di taon patolu pulu duahon mamarenta si Artahsasta raja ni Babel kehe do au tu Babel laho mangalapur tu kesar i. Dung adong pe sanga na sadia lolot anso dipaloas au

⁷ mulak mangulahi tu Jerusalem. Disi lalu au di Jerusalem, tarsonggot ma au dung huboto na dilehen si Elyasib tu si Tobia sada kamar na di Bagas Ni Tuhan i.

⁸ Sun ma murukku jana hudanggurkon ma tu ruar sude barang ni si Tobia i.

⁹ Dung i husuru ma anso dibaen upacara marpangir paiaskon angka kamar i. Dung i pe anso hupaulak tusi sude angka haul gandum dohot hamonyan dohot angka alat-alat ni Bagas Ni Tuhan.

¹⁰ Tamba ni i, hudapot muse ma na dung ditadingkon angka parmusik, dohot angka halak Levi Jerusalem jana mulak halahi tu angka ladang ni halahi be, hara ni na so cukup haporluan ni halahi dibaen rayat i.

¹¹ Gabe hugorahon ma angka hatobangon dibaen dipadiar halahi antong margailan Bagas Ni Tuhan i. Jadi hupiohon ma mangulahi angka halak Levi dohot angka parmusik i jana husuru markarejo mangulahi.

¹² Dung i diulahi rayat ni Juda ma muse mangalehen parsampuluan ni gandum, anggur dohot miak zetun jana diparobani be ma i tu kamar panyimpanan.

¹³ Hutongoskon ma Malim Selemia, si Zadok Ahli Uhum i dohot si Pedaya halak Levi i laho mangawasi angka kamar panyimpanan i. Hutugaskon muse si Hanan anak ni si Zakur jana pahompu ni si Matania i mangurupi halahi. Angke huboto do haposan do halahi jana uruson ni halahi do pambagi ni bahan-bahan i tu angka dongan sakarejo ni halahi satigor-tigorna.

¹⁴ Ale Debatangku, ingot ma sude na dung hubaen tu BagasMu dohot tu na mangoloi disi.

¹⁵ Huida ma di hatiha i sanga na piga-piga halak di Juda na mamoro anggur di Ari Sabat. Adong muse deba nari na marmuat gandum, anggur, batu ni anggur, batu ni ara dohot barang-barang na asing di ginjang ni halode jana dioban tu Jerusalem. Hularang antong halahi marjagal di Jerusalem.

¹⁶ Adong halak na sian Tirus na maringanan di Jerusalem maroban harasak dohot barang sigadison marragam-ragam tu Jerusalem di Ari Sabat, sigadison tu rayat i.

¹⁷ Hugorahon ma angka pamimpin ni Juda i jana hudok, “Na so sadar dehe hamu bahaso na dung mambaen hajahatan hamu hara ni na pahodar Ari Sabat?

¹⁸ Patunda ni dosa na songon on ma da umbaen na hona uhum ni Debata angka ompumunu jana dironcohon kota on. Na giot tambaanmunu ma he saonnari rimas ni Debata tu Israel di na pahodar Ari Sabat i?”

¹⁹ Jadi gabe huparentahon ma, anso ganop bona ni Ari Sabat, i ma Ari Jumahat borngin, manigor ditutup angka pintu horbangan dung andospotang jana nada tola bukaon salolot so salpu Ari Sabat di Sabtu borngin. Hubaen sanga na piga halak anak bua i di angka pintu horbangan laho manjago anso ulang adong barang sigadison dioban masuk tu bagasan kota i di Ari Sabat.

²⁰ Tapi huhul laing adong do deba parjagal dohot panggadis barang-barang na marborngin di ruar ni tembok di Ari Jumahat borngin.

²¹ Hudok do tu halahi, “Parcuma do hamu paintehon disi lopus manyogot. Awas, muda laing dibaen hamu dope songon i sanoli nari, koras noma baenonku!” Mamungka sian i nada unjung be halahi ro di Ari Sabat.

²² Jadi husuru ma angka halak Levi patupahon upacara paiaskon diri dohot manjago angka pintu horbangan laho mangawasi anso dipasangap halak Ari Sabat i. Martangiang ma au, “Ale Debatangku laing ingot ma au hara ni pangalahongki jana ibo ma rohaMu di au hombar tu godang ni holong ni rohaMu.”

²³ Laing huida muse ma di hatiha i na dung bahat do hape halak Jahudi na mambuat boru sian bangso Asdod, Amon dohot Moab.

²⁴ Deba sian dakdanak ni halahi nada dibotosa be hatanami sandiri, tapi marhata Asdod noma sanga marhata sileban na asing i.

²⁵ Hugorahon antong halahi jana huburai. Adong do na hubalbali jana hujangging obukna i, dung i husuru ma halahi marsumpa mangasahon goar ni Debata songon on: “Na so jadi lehenonmunu borumunu tu anak ni halahi, jana na so jadi alaponmunu boru ni halahi bahen dadaborumunu, sanga bahen dadaboru ni anakmunu sandiri!”

²⁶ Hudok, “Nada he dosa na songon on do na nibaen ni Raja Salomo? Nada adong raja na gumodang sian ia di portibi on. Dihaholongi Debata ia jana dibaen ia gabe raja di sandok Israel. Tapi haru songon i pe dielek-elek angka boru ni bangso na asing do ia laho mambaen dosa.

²⁷ Sun do da jahatmunu! Puluk hamu antong mangalo Debata marhite na mambuati boru sian bangso na asing!”

²⁸ Anak ni Malim Godang Elyasib do si Joyada, tapi sada sian anak ni si Joyada gabe hela ni si Sanbalat na sian kota Bet-Horon i. Jadi hara ni i gabe huusir si Joyada sian Jerusalem.

²⁹ Martangiang ma au, “Ale Debatangku, ingot ma sanga na bia dibaen halahi pahodarkon jabatan hamalimon i jana ingot ma parjanjianna dohot angka malim bope dohot angka halak Levi!”

³⁰ Songon i ma hubaen paiaskon bangso Israel sian sude na asing. Hupahot karejo ni angka malim, dohot angka halak Levi, jadi gabe adong be ma karejo ni halahi sada-sada be.

³¹ Laing huatur muse ma anso rade dibaen rayat i soban sipakeon tu parhaulan di hatiha na tontu jana dioban haul sian suha ni gandum na parjolo malamun. Ujungna martangiang ma au, “Debatangku, ingot ma sudena on jana ibo ma rohaMu mida au.”