NEHEMIA 11 - BIBEL JAMITA NA DENGGAN

Halak na maringanan di Jerusalem

¹ Hot ma maringanan angka pamimpin di Jerusalem jana mambaen undi ma rayat i laho sada ripe sian ganop sampulu ripe na angkon tinggal di kota na badia Jerusalem. Angka na so tarpili i, tola do maringanan di angka kota na asing.

² Adong do sian tonga-tonga ni halahi na rela totop di Jerusalem jana dipuji rayat i do halahi.

³ Di angka kota na asing i, maringanan di tanona sandiri be do rayat ni Israel, angka malim, angka halak Levi, angka parkarejo di Bagas Ni Tuhan dohot pomparan ni angka pangoloi ni si Salomo di angka kota ni halahi be. Anggo halak Juda dohot Benyamin maringanan di Jerusalem do.

^4-6 Deba sian Marga Juda dohot Benyamin na maringanan di Jerusalem, angka on ma goar-goar ni halahi: Na sian Marga Juda: Si Ataya anak ni si Usia jana pahompu ni si Zakaria. Deba sian ompu na umpompar ia, i ma: Si Amarya, si Sefaca dohot si Mahalaleel, si Peres, si Juda. 468 halak bahatna angka na sun barani. Si Maaseya anak ni si Baruk jana pahompu ni si Kolhose. Deba sian angka ompu na umpompar ia, i ma: Si Hasaya, si Adaya, si Joyarib, si Zakaria, si Sela, si Juda.

^7-8 Na sian Marga Benyamin: Si Salu anak ni si Mesulam jana pahompu ni si Joed. Deba sian angka ompu na umpompar halahi, i ma: Si Pedaya, si Kolaya, si Maaseya, si Itiel dohot si Jesaya. Si Gabai dohot si Salai. Solkot dope parhahamaranggion ni halahi tu si Salu. Pungu ma sude halahi 928 halak, i ma na nipimpin ni

⁹ si Joel anak ni si Zikri dohot wakilna si Juda anak ni si Hasenua.

^10-11 Angka malim: Si Jeyada anak ni si Joyarib dohot si Jakin. Si Seraya anak ni si Hilkia jana pahompu ni si Mesulam. Deba sian ompu na umpompar halahi, i ma: Si Zadok, si Merayat, si Ahitub na manjabat Malim Godang.

¹² Pungu sude 822 malim na markarejo di Bagas Ni Tuhan. Si Adaya anak ni si Jeroham jana pahompu ni si Pelalya. Deba sian angka ompu na umpompar ia, i ma: Si Amsi, si Zakaria, si Pasur dohot si Malkia.

¹³ Bahat ni kapala ripe di na sahorong i adong 242 halak. Si Amasai anak ni si Asareel jana pahompu ni si Ahsai. Deba sian ompu na umpompar ia, i ma: Si Mesilemot dohot si Imer.

¹⁴ Adong do 128 halak sian horong on angka pahlawan na barani. Si Zabdiel do pamimpin ni halahi, i ma anak ni si Gedolim.

^15-18 Angka halak Levi: Si Semaya anak ni si Hasub jana pahompu ni si Asrikam. Angka ompu na umpompar i deba i ma: Si Hasabya, dohot si Buni. Si Sabetai dohot si Josabad, i ma angka halak Levi na manontuhon di na mangawasi parkarejoan di ruar ni Bagas Ni Tuhan. Si Matania anak ni si Mika jana pahompu ni si Zabdi na sian pomparan ni si Asap. Ia do na mamimpin angka parende di na martangiang tarimakasi. Si Bakbukya wakil ni si Matania. Si Abda anak ni si Samua jana pahompu ni si Galal, na sian pomparan ni si Jedutun. Pungu ma sude 284 halak.

¹⁹ Angka sijago pintu horbangan: Si Akub, si Talmon dohot angka kahanggi ni halahi. Pungu sude 172 halak.

²⁰ Rayat Israel, angka malim dohot angka halak Levi na asing i, maringanan di tano ni halahi ma i di angka kota na marragam na adong di Juda.

²¹ Anggo angka parkarejo ni Bagas Ni Tuhan maringanan di na margoar Opel do halahi, i ma sada bagian sian kota Jerusalem. Si Ziha dohot si Gispa do na mamimpin karejo ni halahi.

²² Pangawas ni angka Levi na maringanan di Jerusalem, i ma si Usi anak ni si Bani jana pahompu ni si Hasabia. Ompu na umpompar ia deba, i ma, si Matania dohot si Mika. Masuk tu horong ni si Asap do ia, i ma na markarejo marende na di Bagas Ni Tuhan.

²³ Geleran ni ganop horong laho mangurus musik di Bagas Ni Tuhan ganop ari, paraturan ni raja do manontuhon i.

²⁴ Si Petahya anak ni si Mesesabeel na sian horong ni Zera na sian Marga Juda, i ma na gabe wakil ni bangso Israel.

Angka halak na sian kota na asing

²⁵ Angkup ni sian horong Juda, adong do deba maringanan di kota pagaran dohot di ladang ni halahi na donok tu Kiryat-Arba dohot di pagaran na masuk tusi; di Kabseel dohot di pagaran na masuk tusi.

²⁶ Di Jesua, di Molada, di Bet-Palet.

²⁷ Di Hasar-Sual, di Ber-Seba dohot di pagaran na masuk tusi.

²⁸ Di Siklag, di Mekona dohot pagaran na masuk tusi.

²⁹ Di En-Rimmon, di Zora, di Jarmut.

³⁰ Di Sanoa, di Adullam dohot angka hutana. Di Lakis dohot angka ladangna, di Aseka dohot di pagaranna. Jadi songon i ma halahi marhuta sian Ber-Seba lopus tu Rura Hinnom.

³¹ Deba sian Marga Benyamin maringanan do di Geba, Mikmas, Aya, Bet-El dohot di angka huta na di lambungna i,

³² di Anatot, Nob, Ananya,

³³ Hasor, Rama, Gitaim,

³⁴ Hadid, Zeboim, Nebalat,

³⁵ Lod, Ono, dohot di Rura ni angka Tukang.

³⁶ Deba sian rombongan ni halak Levi na maringanan humani di tano Juda, disuru do maringanan rap dohot angka halak Benyamin.