NEHEMIA 1 - BIBEL JAMITA NA DENGGAN

¹ On ma lapuran ni si Nehemia anak ni si Hakalya salaho tu angka na nibaennia. Di bulan Kislev taon padua puluhon mamarenta si Artahsasta gabe raja di Persia, au, si Nehemia topet do di Susan, kota sabungan ni harajaan i.

Dokdok do roha ni si Nehemia pasari-sari Jerusalem

² Ro do di hatiha i kahanggingku si Hanani sian Juda rap dohot piga-piga halak. Jadi husapa-sapai ma halahi taringot tu pangalaho na masa di Jerusalem dohot taringot tu angka halak Jahudi na mulak sian habuangan na di Babel.

³ Dicaritohon halahi ma, hapengani na mahancit do ngolu ni angka halak na tarbuang na dung marmulahan mangulahi tu tanona i hara ni na nipalayas ni angka bangso na humaliangna i. Boti muse, laing na maropuk-ropuk dope masarsar angka tembok ni kota Jerusalem jana angka pintu horbanganna i pe nada podo dipadenggan mamungka sian na hona surbu di hatiha na salpu.

⁴ Umbege barita i, juguk ma au jana tangis. Sanga na piga ari lolotna sai tangis au. Torus do au puaso lalu martangiang tu Debata,

⁵ “Ale Tuhan Debata na markuaso di banua ginjang Debata Na Godang do Ho, jana di bagasan gok biar do hami ro mangadop tu Ho. Sai tongtong do holong rohaMu di angka na mangkaholongi Ho jana na mangoloi parentaMu jana ditiop Ho do janjiMu tu halahi.

⁶ Tatap ma au Tuhan, jana tangihon ma tangiang na hupagincat tu adopanMu arian dohot borngin salaho tu halak Israel, angka naposoMi. Huoku do anggo hami bangso Israel madung mardosa; salangkan au pe dohot angka daompung na dung mardosa muse do.

⁷ Anak panggagai do hami tu Ho jana pangalanggar di angka parentaMu. Nada hami oloi angka uhum na nilehenMu tu hami marhite si Musa, naposoMi.

⁸ Ale Tuhan, ingot ma angka hataMu na niparentahonMu pajojoron ni si Musa mandok, muda nada setia hami bangso Israel tu Ho, sai na paserahonMu hami di tonga-tonga ni angka bangso na asing.

⁹ Tapi muda mulak hami mangulahi tu Ho jana hami oloi parentaMu, jadi palagutonMu ma hami mangulahi na dung dipaserakMi haru pe hami di angka ujung ni portibi on. Dung i paulahonMu ma hami tu inganan na dung ditodoMi gabe inganan maribadat tu Ho.

¹⁰ Tuhan, angka naposoMu do hami on, halakMu sandiri na dung nipaluaMu dohot kuaso bope dohot hagogoonmu na sumurung i.

¹¹ Tangihon ma tangiangku dohot tangiang ni sude naposoMu na asing i, na ra pasangankon Ho. Lehen ma pangurupiMu anso laing tulus naposoMon sadari on dapotan asi ni roha sian raja.” Siurus inumon ni raja do au di hatiha i.