MIKA 4 - BIBEL JAMITA NA DENGGAN

Diparenta Tuhan portibi on di bagasan dame

¹ Anggo tu angka ari na ro dolok ni Bagas Ni Tuhan tarida ma gumincat jana tigor ma i jongjong manyalpui angka dolok na gincat. Marroan ma tusi angka bangso;

² dokkonon ni halahi sudena ma, “Manangkok ma hita tu dolok ni Tuhan tu Bagas Ni Debata na nisomba ni Israel bangsoNa! AjarkononNia ma tu hita sanga aha na patut baenonta. Ihutkononta ma dalan na nipiliNia. Angke sian Sion do haroro ni pangajaran, jana hata ni Tuhan sian Jerusalem.”

³ Putuskonon ni Tuhan ma parkaro antara ni bahat bangso na adong di tano, antara ni angka harajaan na gogo, na donok pe dohot na dao. Topaon ma podang gabe bajak piso parpangkas manggonti tombak. Nada be marsiporangan angka bangso, nada be markobas kehe manyaroso.

⁴ Mangolu be jolma di bagasan na aman jana marhasonangan ditonga-tonga ni kobun anggur dohot kobun arana; nada adong be na pabiar-biarkon, i ma da janji ni Tuhan Na Markuaso.

⁵ Ganop bangso na adong di portibi mangoloi be jana marsomba tu debatana sandiri. Tapi anggo hita haburjuhononta ma mangoloi Tuhan Debatanta jana tasomba Ia salolot-lolotna.

Mulak ma Israel sian habuangan

⁶ Didok Tuhan ma, “Dapot do i muse hatihana palagutonKu angka jolma na Huuhumi i, i ma angka na markancit di habuangan i.

⁷ Damos halahi dionyakkon jana dao sian huta hagodangan. Tapi sian angka jolma na teba i, giot pungkaonKu ma sada sundut na imbaru. Gabe bangso na godang ma halahi boti na gogo. Au do na mamarenta halahi di Dolok Sion salolot-lolotna.”

⁸ Jana ho, ale Tugu Punguan ni Biribiri, ale Tor ni boru Sion, giot ro ma tu ho jana angkon mulak muse harajaanmu songon na jolo, harajaan ni boru Jerusalem.

⁹ Biasi mangangguhi ho tangis? Biasi marnyae ho songon ina na giot hipas? Adong he hara ni na so adong rajamunu jana marmatean angka panuturimu?

¹⁰ Ale halak Jerusalem, marngeat jana mangangguhi ma hamu songon ina na tubu-tubuan! Harana, angkon tadingkononmunu noma kota saonnari jana maringanan di padang-padang noma hamu. Angkon kehe ma hamu tu Babel, tapi paluaon ni Tuhan do hamu disi sian angka musumunu.

¹¹ Madung marlagut bahat bangso laho mamorangi ho, ale Jerusalem! Pandok ni halahi, “Angkon roncohonon do Jerusalem! Idaonnami ma kota i gabe timbunan ni angka batu!”

¹² Tapi na so diboto ni angka bangso i do sanga aha na di bagasan sangkap ni Tuhan. Sian na so pamotoan ni halahi, na dipalagut do halahi anso diuhum, tudos tu gandum na dilunggukkon anso didege.

¹³ Didok Tuhan do, “Ale halak Jerusalem, kehe ma hamu manguhumi angka musumunu! BaenonKu ma hamu margogo songon lombu na martanduk bosi jana marsisilon tumbaga. Ropuhonmunu ma bahat bangso jana sinadonganna i na dapot songon barang rampasan haulkononmunu ma i tu Au, Tuhan ni sandok tano on.”

¹⁴ On pe, ale halak Jerusalem, patogu hamu ma partahananmunu! Madung hona hobuk hita! Madung diporangi musu i pamimpin ni Israel!