MIKA 2 - BIBEL JAMITA NA DENGGAN

Bagian ni angka jolma na mamisat halak na pogos

¹ Marjaya ma angka jolma na mambaen sangkap hajahatan taran modom di podomanna borngin-borngin, lalu dipadalan ia sangkap i dung torang ari hara ni na tumbuk tarpadalan ia.

² Muda por roha ni halahi di sada ladang, dirampas halahi do i. Muda por roha ni halahi di sada bagas, dirampas halahi sajo do i. Muda dung abis hartona dirampas, angka koum sisolkot pe nada be sonang.

³ Hara ni i didok Tuhan ma, “Marsangkap do Au laho parohon parmaraan godang tu hamu, anso ulang adong na malua sian hamu. Nada tarbaen be gakgak pardalanmu angke anggo hatiha i, i ma hatiha na marmara.

⁴ Anggo di hatiha i, caritohonon ni halak ma na nitaonmunu gabe tudosan ni parmaraan, jana baenonna ma ende hamarsahan songon on, ‘Madung mago hita! Pusako ni bangsongku madung disuhat dohot tali, jana nada adong be halak na paulakkonsa, angka kobunta pe madung di bagi-bagihon tu halak na manaban hita.’ ”

⁵ Hara ni i, muda dung dapot hatihana paulahon tano on tu bangso ni Tuhan, sahalak pe nada adong be sian hamu na manjagit bagianna.

⁶ Marjamitai angka jolma tu au, mandok, “Ulang be marjamita ho tu hami. Ulang jamitahon sudena i tu hami. Nada ra Debata pailahon hami.

⁷ Ulang diambang ho na hona bura ni Tuhan halak Israel. Nada unjung salpu sobar ni Tuhan. Nada ra Ia mambaen na songon i. Nada he burju Ia tu angka jolma na tigor pambaenanna?”

⁸ Dialusi Tuhan ma, “Hamu do na mamorangi bangsongKu songon musu. Dirampas hamu do baju ni halak na baru mulak sian porang jana sonang do rohamunu di bagasna.

⁹ Angka dadaboru sian tonga-tonga ni bangsongKu diusir hamu do sian dongan sabagasna na nihaholongan ni rohana, jana dipambuati hamu angka dakdanak ni halahi na songon pasupasungKu hian di halahi sapanjangna.

¹⁰ Jongjong ma hamu jana morot; nada aman be dison. Gabe ro ma parmaraan, hasegoan tu inganan on hara ni angka dosamunu i.

¹¹ Sugari ro sahalak na sai margabus, ‘Paboanku ma hasurirangon tu hamu, taringot tu anggur dohot arak.’ Jadi ia do na patut manyurirangi tu bangso on!”

Janji taringot tu haluaan

¹² Didok Tuhan ma mangulahi, “Ale halak Israel na teba! Angkon palagutonKu do hamu jana pasadaonKu songon biri-biri na mulak tu barana. Songon padang na gok biri-biri, laing songon i ma tanomunu mangulahi gok dohot bahat ni jolma.

¹³ BukaonKu ma dalan jana obanonKu hamu haruar sian habuangan. Onjarkononmunu ma angka pintu ni horbangan jana kehe ma hamu so adong mangambat. Au Tuhan, Au sandiri Rajamunu, jana Au manguluhon hamu haruar.”