MIKA 1 - BIBEL JAMITA NA DENGGAN

¹ Marasal sian sada kota na menek do si Mika i ma sian kota Moreset. Di na marudut-udut mamarenta di Juda Raja Jotam, Raja Ahas dohot Raja Hiskia, disi ma dilehen Tuhan tonaNia tu si Mika taringot tu Samaria dohot Jerusalem.

Andung taringot tu Samaria dohot Jerusalem

² Tangihon hamu ma, ale angka bangso! Parrohahon ma, ale angka na mangingani tano! Masuk do Tuhan Debata tu paruhuman gabe saksi mangalo hamu sudena! Tangihon ma Ia mandok hata sian bagasNia Na Badia i.

³ Manuat do Ia sian parmiananNa na badia i, jana mardalan di angka puncu ni dolok na di portibi.

⁴ Malala do angka dolok di toru ni patNia tudos tu lilin di bagasan api na gara; madencur angka dolok i lalu tu rura, songon aek di tor na marsasak tu lombang.

⁵ Tarjadi pe sudena i hara ni na mardosa jana mangalo do halak Israel tu Debata. Ise dehe na sala umbaen jabat Israel mardosa? Nada he Samaria kota sabunganna sandiri do? Ise dehe na sala umbaen jabat Jerusalem marsomba gana-ganaan? Nada he Jerusalem sambing do?

⁶ I do umbaen na nidok ni Tuhan: “BaenonKu ma Samaria gabe timbunan ni batu di tonga padang dohot panyuanan ni bona ni anggur baenon ni halak. AmbungkononKu tapor-tapor ni kota i tu bagasan holbung jana bungkaronKu angka jongjonganna i.

⁷ Angka patungna sigodang arga i diropuk, sude na dilehen tu angka dadaboru na markarejo di bagas pamelean i hona tutung, jana sude gana-ganaanna i disegohon. Dijagit Samaria do sudena i gabe sipakeonna di bagasan ibadatna tu debata hagabean. Saonnari obanon ni angka musuna noma sudena i gabe ibadat di inganan na asing.”

⁸ Dung i ning si Mika ma: “Hara ni i do umbaen na marsak au jana tumatangis hara ni arsak ni rohangku, kehe ma au mardalan nada marsolop jana nada marpakean. Sai marauang ma au songon sorigala jana sai mangandungi songon unggas unto.

⁹ Nada tarpamalum be gasa ni Samaria, jana laing hona muse ma pangalaho na sarupa tu Juda. Ma pola lalu parmaraan godang tu pintu horbangan ni Jerusalem, inganan ni bangsongku.”

Lalu ne ma musu di Jerusalem

¹⁰ Ulang paboa-boa hamu hataluonmunu i tu musumunu di Gat; ulang padiar hamu diida halahi tangis hamu. Ale hamu halak Bet-Le-Afra, margiling ma hamu di abuan tanda ni pandelean!

¹¹ Hamu na maringanan di Safir, kehe ma hamu tu habuangan nada marpakean jana mardongan ila ni roha! Angka halak Zaanan nada puluk ruar sian kotana. Angguk ni halak Bet-Haesel, i ma patuduhon tu hamu na so adong be pangondian disi.

¹² Sak do roha ni halak Marot mararop roha di pangurupion, dibaen madung lalu parmaraan godang na sian Tuhan di jolo ni pintu horbangan ni Jerusalem.

¹³ Hamu halak na maringanan di Lakis, pasang hamu hian ma kudo ni kareta porang! Ditiru-tiru hamu do dosa na masa di Israel mambaen gabe dohot boru Sion mardosa.

¹⁴ Hara ni i lehenon ma tanda parsirangan tu Moreset-Gat. Nada dapotan bantuan be angka raja ni Israel sian kota Akhsib.

¹⁵ Ale halak Maresa! Pasahaton ni Tuhan ma hamu tu musu na giot manaluhon kotamunu. Martabuni di angka liang ma angka pamimpin ni Israel di Adulam.

¹⁶ Hamu ale halak Juda, gusting hamu ma obukmunu tanda ni siluluton hara ni angka dakdanak haholongan ni rohami. Gusting obukmi lopus gundul songon unggas sipangan bangke, angke obanon noma angka dakdanakmu tu habuangan.