MASMUR 97 - BIBEL JAMITA NA DENGGAN

Debata parkuaso godang

¹ Tuhan do raja! Padiar ma marolop-olop tano on, padiar ma marlas ni roha angka pulo.

² Ombun dohot hagolapan manggupgupi Ia, hatigoran dohot uhum do ojahan ni pangarajaionNia.

³ Mangararati api di joloNia, abis marmosokan, musu na humaliang Ia.

⁴ Ditorangi hilapNa i portibi on, humitir tano on marnidasa.

⁵ Angka dolok maderder songon lilin di jolo ni Tuhan, di adopan ni Tuhan parkuaso ni sude portibi on,

⁶ Dipajojor langit hatigoranNia, sandok bangso marnida hamuliaanNia.

⁷ Sude na marsomba gana-ganaan dipaila, angka halak na mamuji dirina hara ni gana-ganaan. Sude debata marsomba sujut di jolo ni Tuhan.

⁸ Sonang pangkilaan ni halak Sion dohot angka kota ni Juda di na umbege haputusan ni Tuhan.

⁹ Dirajai Tuhan Na Gumincat i do sude tano on na tongam do Ia mangalobii angka debata.

¹⁰ O hamu angka na manghaholongi Tuhan, hagigihon hamu ma hajahatan. Dibaen diondihon Tuhan do ngolu ni bangsoNa, dipalua Ia halahi sian kuaso ni halak na so hasaya.

¹¹ Halak na tigor ditorangi sinondang, halak na jujur gok jop ni roha.

¹² Marjop ni roha ma hamu hara ni Tuhan, ale angka halak na bulus marroha, jana mandok tarimakasi ma hamu tu Debata na badia.