MASMUR 96 - BIBEL JAMITA NA DENGGAN

Debata, raja godang

¹ Endehon ma logu na imbaru di Tuhan! O hamu portibi sudena, marende ma hamu di Tuhan.

² Marende ma hamu di Tuhan, puji hamu ma goarNa. Baritahon hamu ma ganop ari jamita haluaanNia.

³ Caritohon hamu ma tu angka bangso hagodanganNia, paboa ma angka hahomangan na nibaenNia tu sude jolma manusia.

⁴ Angke na godang do Tuhan jana na tarpuji situtu do Ia, manyalpui sude debata patut dilehen sangap tuSia.

⁵ Patung sajo do anggo debata ni bangso na asing i, tapi anggo Tuhanta, Ia do na manompa alam sasudena i.

⁶ Hasangapan dohot hamuliaan manggohi Ia, kuaso dohot hajagaron manggohi BagasNia.

⁷ Puji ma Tuhan, ale hamu jolma manusia, puji ma hamuliaan dohot hagogoanNia.

⁸ Puji hamu ma goarNia na marmulia, oban hamu ma haul tu bagasan BagasNia.

⁹ Somba hamu ma Tuhan marhite habadiaan, humitir ma di adopanNia, ale sandok tano on!

¹⁰ Baritahon ma tu angka bangso, “Raja do Tuhan! Togu do portibi nada tarhutur, diuhumi Ia angka bangso marhite hatigoran.”

¹¹ Marjop ni roha ma nian langit dohot tano, jana gumadobur ma laut dohot sude isina.

¹² Marjop ni roha ma padang jana na tubu disi marsonang-sonang, angka hayu di harangan marsurak marriang-riang.

¹³ Dibaen ro do Tuhan mangarajai tano on, marhite hatigoran diuhumi Ia angka bangso.