MASMUR 95 - BIBEL JAMITA NA DENGGAN

Ende pujian

¹ Beta marende hita di Tuhan, marsurak-surak di pangondinginta!

² Beta ma mangadop tuSia mardongan logu tarimakasi, marsurak-surak diSia mardongan masmur.

³ Angke Debata na godang do Tuhan, raja na marsahala mangatasi sandok debata.

⁴ Dirajai Ia do sandok tano on, sian bagian na umbagas lopus tu angka dolok na gincat.

⁵ Dirajai Ia do laut na nibaenNia, darat pe laing karejo ni tanganNia.

⁶ Beta ma hita tungkap, jana marsinggang ma hita tu jolo ni Tuhan na manompa hita.

⁷ Angke Ia do antong Debatanta, bangso na niparmahananNia do hita, songon biri-biri na nitogu-toguNia. Jadi saonnari tangihon ma soraNia:

⁸ “Ulang hamu tangkang songon ompumunu i, dompak di Meriba halahi, di parhorsihan Masa.

⁹ Diuji halahi do Au disi, haru pe na dung diida halahi nian pambaenanKu.

¹⁰ Opat pulu taon honokna magigi Au paida-ida halahi, ningKu: Tutu ma antong bangso na so haposan halak on! Nada diampirkon halahi angka na Huparentahon.

¹¹ Gabe marsumpa Au di bagasan murukKu, nada masuhan ni halahi tano i laho maradian rap dohot Au.”