MASMUR 94 - BIBEL JAMITA NA DENGGAN

Diuhumi Debata sude jolma

¹ Ale Debata, Ho do Debata na mambaloskon, patuduhon ma pamalosonMi ale Debata!

² Jongjong ma Ho ale Panguhum ni sandok tano on, uhumi ma halak siginjang roha hombar tu pambaenanna.

³ Ale Tuhan, intap ni andigan parjahat i marjop ni roha, lopus sadihari halahi marmoga-moga?

⁴ Dipardokkoni halahi do hata na kasar, jana dihasombongkon halahi do angka hajahatanna i.

⁵ Ale Tuhan, diparkanciti halahi do bangsoMu, diropuk halahi do angka jolma na nipiliMu.

⁶ Dibunu halahi do ina na mabalu dohot na so marama so marina dohot halak na asing na maringanan di luat on.

⁷ Didok halahi, “Nada diida Tuhan i, nada diparrohahon Debata ni Jakob i.”

⁸ Pardiatehon ma, o hamu angka jolma na oto! Andigan dope hamu marsiajar mamake pikiranmi?

⁹ Debata do na mambaen pinggolta, patut ma he nada marbinege? Ia do na mambaen matanta, patut ma he nada marnida?

¹⁰ Ia do mangajari angka bangso, patut ma he nada manguhumi Ia? Ia do guru ni sandok jolma, patut ma he nada marparbinotoan Ia?

¹¹ Didodo Tuhan do pikiran ni jolma, diboto Ia do sangkap ni halahi na so marguna.

¹² Ale Tuhan, martua ma halak na nipodaanMu, halak na niajarkonMu angka uhumMu.

¹³ Dipasonang Ho do ia di angka ari hasusaan, lopus madabu halak parjahat tu bagasan lubang.

¹⁴ Angke nada ra Tuhan i mangambungkon bangsoNa, jana nada tadingkononNia nampunaNia sandiri.

¹⁵ Jadi gabe mardalan ma uhum di pangadilan gogohonon ni sude halak na jujur ma i.

¹⁶ Ise do mambela au maradopkon halak parjahat? Ise do mamihak tu au mangalo halak sibaen jahat?

¹⁷ Sugari nada diurupi Ho au, ale Tuhan, na giot bungkas hian noma au tu portibi ni na mate.

¹⁸ Di na marpikir au, na giot madabu noma au, holong ni rohaMu na manongtong i ma na mambaen au jongjong togu.

¹⁹ Di na marsak rohangku jana humasusa, Ho do mangapoi dohot pajop rohaniba.

²⁰ Nada marpardomuan Ho dohot angka panguhum na so ture na mambaen sah na so pade.

²¹ Marsatahi halahi mangalo halak na jujur, jana mandabu uhuman mate tu halak na so marsala.

²² Hape ale Tuhan, Debatangku, Ho do mangondingi au.

²³ Diuhum Ho do halak na jahat hara ni hajahatanna, dipangabis Ho do halahi hara ni dosana. Tuhan Debatanta giot patimpaskon halahi.