MASMUR 90 - BIBEL JAMITA NA DENGGAN

BUKU PAOPATKON: MASMUR 90-106 Debata do inganan parlindungan ni jolma

¹ Ale Tuhan, Ho do inganan parlindungannami sian najolo, marsundut-sundut,

² taran so dijadihon Ho dope angka dolok, jana dompak so ditompa Ho dope tano on dohot portibi on. Ho do Debata na manongtong, na so marmula na so marujung.

³ Disuru Ho do mulak jolma tu asalna, gabe abu songon di mulana.

⁴ Anggo di Ho saribu taon, dos do i songon ari natuari, songon panjago di hatiha borngin.

⁵ Diayup Ho do hami; songon nipi sajo do hami songon duhut na martumbur;

⁶ martumbur ma i manyogotna i jana mangerbang, tapi gabe malos do i muda dung potang.

⁷ Tarsonggot hami dibaen murukMu, maropuk pambaen ni murukMu.

⁸ Dipatalak Ho angka dosanami di joloMu, dosanami na buni pe torang do di parnidaanMu.

⁹ Ma pendek ngolunami hara ni rimasMu, songon sangombus hosa do ari-arinami i maradu salpu.

¹⁰ Hum pitu pulu taon do lolot ni ngolunami, lalu salapan pulu taon muda margogo hami. Tapi hum hasusaan dohot hamaolon do na dapot hami, dung salpu ngolu na pendek i, mago ma hami.

¹¹ Ise unjung manghilalahon hasogenon ni rimasMu? Ise umboto akibat ni murukMu?

¹² Sai ajari ma hami mangetong angka ari-arinami, anso dapotan roha na bisuk hami.

¹³ Ale Tuhan intap ni andigan sai milas rohaMu? Marpangulahi jana ibo ma rohaMu di angka naposoMon.

¹⁴ Duruskon ma holong ni rohaMu tu hami ganop manyogot, anso marjop ni roha hami jana marende salolot hami mangolu.

¹⁵ Lehen ma di hami hatuaan saimbang tu sitaononnami, na hami tanggung di angka taon pardangolannami.

¹⁶ Patuduhon ma karejoMu tu hami angka naposoMu, anso diida pomparannami godang ni kuasoMu.

¹⁷ Ale Tuhan Debatanami, pasupasu ma hami, anso manjadi sude karejonami.