MASMUR 9 - BIBEL JAMITA NA DENGGAN

Tangiang mandok tarimakasi hara ni hatigoran ni Debata

¹ Sian sasude roha hudok tarimakasi tu Ho, Tuhan. Giot paboaonku ma angka pambaenanMu na pahomangkon roha.

² Hara ni Ho, dapot au roha na sonang hupuji goarMu, Tuhan Na Markuaso.

³ Di joloMu angka musungku marbalik jana kehe, tinggang halahi tartuktuk lalu mate.

⁴ Ho do pangurupi di parkarongku, angke Ho do panguhum na tigor.

⁵ Angka bangso diuhumi Ho, halak na jahat dipusa Ho. Goar ni halahi madung diapuskon; ro di salolotna halahi dihalupahon.

⁶ Dironcohon Ho musu dohot angka kota ni halahi, nada adong be na marningot i.

⁷ Tuhan do raja di sude tingki, sian habangsaNa, diuhumi Ia portibi.

⁸ Mardongan hatigoran diparenta Ia angka bangso i, dohot hasintongan diuhumi Ia halahi.

⁹ Tuhan do parondingan ni halak na nidondonan, inganan parlojongan di hatiha hasusaan.

¹⁰ Halak na mananda Ho, mararop ni roha tu Ho Tuhan, halak na mangalului Ho nada ra Ho maninggalkon.

¹¹ Debata na mamarenta di Sion, Ia do sipujion! Paboa ma pambaenanNia tu sude bangso.

¹² Diingot Ia do halak na tangis jana diparkanciti, jana diuhum Ia halak na mandondoni halahi.

¹³ Ligi ma pambaenan ni musu mangarsaki au, ibo rohamu Tuhan sian hamatean palua au!

¹⁴ Di jolo ni pangisi ni Jerusalem, kota na badia i jongjong au mangendehon pujian. Giot paboaonku sude pambaenanMu, jop rohangku, angke dipalua Ho au.

¹⁵ Angka bangso na so mananda Ho angkon madabu tu lubang na nihuar ni halahi do. Tu jaring na nitaon ni halahi sandiri Ho mambaen tarjorat halahi.

¹⁶ Dipatidahon Tuhan do diriNa na tigor di bagasan putusanNia. Halak na jahat dabuhononNa hara ni parkarejoanNa.

¹⁷ Hamatean do bagian ni halak pardosa, angka bangso na so manghabiari Debata.

¹⁸ Nada tongtong halak na dangol dihalupahon, nada torus halahi so marpangaropon.

¹⁹ Jongjong ma Ho Tuhan, uhumi ma angka bangso parbegu, ulang padiar jolma i paginjang roha.

²⁰ Padiar ma di bagasan biar halahi, O Tuhan, anso ditanda dirina bahaso na hum jolma sajo do halahi.