MASMUR 85 - BIBEL JAMITA NA DENGGAN

Tangiang salaho tu hadameon ni bangso

¹ Jop do rohaMu ale Tuhan di tanoMu, madung dipasuang Ho parngoluon ni si Jakob.

² Madung disesa Ho dosa ni bangsoMu, diampuni Ho sude hasalaanna.

³ Nada be dimuruki Ho halahi; parpiar ni murukMu ditarik Ho do mangulahi.

⁴ Marpangulahi ma rohaMu mida hami, ale Debata sipalua hami, ulang be muruk Ho tu hami.

⁵ Matua muruhanMu noma hami lakna? Na so mantak be he rimasMu rupana?

⁶ BangsoMu do hami, pargogoi ma hami mangulahi, anso laing marpupu Ho tarpuji hami.

⁷ Patuduhon ma holong ni rohaMu na manongtong i, ale Tuhan, lehen ma di hami haluaan.

⁸ Giotku ma manangihon hata ni Tuhan Debata, dibaen madung dijanjihon Ia pardamean tu hita, bangso na nihaholonganNia, muda tatadingkon antong angka dosanta.

⁹ Tutu ma da, na maringanan Debata na godang di tanonta, jana madung hobas paluahon halak na burju marugamo.

¹⁰ Marsuo ma da holong dohot habonaran dame dohot hatigoran marsihaolan.

¹¹ Tubu ma sian tano habonaran ni jolma, mandulo ma sian langit hatigoran i.

¹² Marsuha ma tanonta na denggan lehenon ni Tuhan ma di hita.

¹³ Joloanan ni hatigoran ma Ia, jana pasingkoponna dalan diSia.