MASMUR 83 - BIBEL JAMITA NA DENGGAN

Tangiang mangido tolong mangalo musu

¹ Ale Debata, ulang ma mangkohom Ho, ulang marlompit tangan Ho jana sai so.

² Ligi ma, sai manggaori angka musu, angka na margoyak ni roha di Ho mangalo.

³ Dibaen halahi do sangkap na mangakali mangalo bangsoMu, marlagut halahi laho mangalo bangso na niondinganMu.

⁴ Didok halahi, “Tole ma tapatimpas bangso Israel, anso ulang sai dipaingot-ingot be halahi.”

⁵ Madung tutu satahi angka bangso, jana marpokat mangalo Ho.

⁶ Bangso Edom dohot Ismael angka Moab dohot Hagar.

⁷ Bangso Gebal, Amon dohot Amalek, bangso Pilistea maradu halak Tirus bage.

⁸ Songon i dohot Asur madung mardomu dohot halahi, gabe kaki tangan ni pomparan ni si Lot do i.

⁹ Antong baen ma tu halahi songon na tu halak Midian, songon Sisera dohot si Jabin na di Batang aek Kison,

¹⁰ na niabiskon di Endor, jana bangkena i gabe napu ni tano.

¹¹ Baen ma pamimpin ni halahi songon si Oreb dohot si Seeb, taluhon ma parkuaso ni halahi songon si Sebah dohot si Salmuna,

¹² angke madung didok angka parkuaso i do hata, “Beta tabuat di hita tano Parmianan Ni Debata.”

¹³ Ale Debata, sampakkon ma halahi songon abu, songon durame na niombuskon ni alogo.

¹⁴ Songon api na mambaen gor harangan, jilam ni api na mangabiskon angka dolok.

¹⁵ Ayak-ayak ma halahi dohot haba-habaMi, songgoti ma halahi dohot alogoMi.

¹⁶ Ale Tuhan, baen ma halahi marmalu-malu, anso dioku halahi noma kuasoMu.

¹⁷ Padiar ma talu halahi jana mabiar sapanjang, padiar ma mate halahi di bagasan habilean.

¹⁸ Anso diboto halahi hum Ho do Tuhan Na Gumincat, Tuhan, na mangarajai sandok portibi.