MASMUR 80 - BIBEL JAMITA NA DENGGAN

Tangiang mangido haluaan ni bangso

¹ Ale Parmahan ni Israel, tangihon ma hami, Ho do pamimpin ni bangsoMu, sai parrohahon hami. Ho na marhabangsa di ginjang ni kerub, ro ma Ho mardongan sahala na godang.

² Patangkas ma kuasoMu di adopan ni Efraim, Benyamin dohot Manase, jana ro ma Ho antong paluahon hami.

³ Pasuang ma hami ale Debata; hara ni habasaonMu, tatap ma hami, jadi gabe malua ma hami.

⁴ Ale Tuhan Debata Na Markuaso, intap ni andigan do Ho muruk, haru pe martangiang bangsoMu?

⁵ Dilehen Ho do parkancitan gabe panganonnami, jana ilu na marabur baen inumonnami.

⁶ Dibaen Ho di tanonami gabe boncir ni partangkangan ni angka bangso na hombar, jana dipartatai angka musu hami.

⁷ Ale Debata Na Markuaso pasuang hami; tatap ma hami hara ni habasaonMi, jadi gabe malua ma hami.

⁸ Songon bona ni anggur do bangsoMu, na nipaimbarMu sian Mesir. Dipaorot Ho angka bangso na asing gabe disuan Ho anggur i di tano ni halahi.

⁹ Dipasingkop Ho do tano, inganan hatubuan ni bonana i. Gabe bagas ma ia marurat jana manjarampak tu sude luat.

¹⁰ Dilaungi Ia angka partoran jana ditutupi angka rantingna i do angka hayu ares na godang-godang.

¹¹ Manjiriri angka rantingna i lopus tu Laut Tonga, angka pusukna i lalu tu Batang aek Efrat.

¹² Ale Debata, biasi dehe dirumpakkon Ho handangna i, gabe sude halak pamolus tarputiksa batuna i?

¹³ Diugei ma i lopus marsegoan, dohot binatang na di padang-padang pe manjampalisa.

¹⁴ O ale Debata Na Markuaso ro ma da Ho mangulahi, manatap ma Ho sian banua ginjang jana parrohahon ma hami.

¹⁵ Ro ma Ho paluahon hami bangsoMon na songon bona ni anggur, i ma na nisuanMu sandiri.

¹⁶ Ma pola ditaba jana ditutung musu i muruhi ma anso mago halahi.

¹⁷ Ondihon ma sanga ise na dung nitodoMu, anak ni jolma na nipahotMu baen di Ho.

¹⁸ Gabe nada manyimbil be hami sian Ho, jagohon ma ngolunami, gabe pujionnami noma Ho.

¹⁹ Ale Tuhan Debata Na Markuaso pasuang ma hami, hara ni habasaonMu, tatap ma hami gabe malua ma hami.