MASMUR 77 - BIBEL JAMITA NA DENGGAN

Pangapoi dompak masa marsak

¹ Gogo do sorangku pio-pio tu Debata, hupagogo sorangku pio-pio, jana ditangihon Ia do au.

² Dompak di hasusaan pio-pio do au tu Tuhan. Sasaborngin huangkat tanganku di na martangiang, hape nada tarapoi anggo rohangku di bagasan.

³ Muda tarsingot rohangku tu Debata, mariale ma au, muda hupasari-sari sudena i, mur magopu ma rohangku.

⁴ Nada tarpodom au bornginna i dibaen Ho, humasusa au, nada tarbaen mandok hata.

⁵ Huingot ma angka ari na salpu tarsunggul ma tu roha angka taon na dung salpu.

⁶ Bornginna i marpikir-pikir ma au jana sapa-sapa di bagasan rohangku,

⁷ “Salolotna noma he ulaning tulakkonon ni Tuhan hami? Na so sonang be he ulaning rohaNia mida hami?

⁸ Na dung mantak dehe Ia mangkaholongi hami? Na so gokanNia be ulaning janjiNia i?

⁹ Na dung lupa dehe Debata laho mangkaholongi hami? Adong he na muruk Ia, gabe nada marholong ni roha be?”

¹⁰ Jadi hudok ma, “Anggo na mambaen dumangol, on do – madung muba be Na Gumincat i.”

¹¹ Sai paingot-ingotonku do angka pambaenanMu, ale Tuhan, huingot do angka pambaenanMu na pahomangkon di hatiha na salpu.

¹² Pasari-sarion ni rohangku do sude pambaenanMu, hupikiri do hagodangan ni parkarejoanMu.

¹³ Ale Debata, na badia do dalanMu, debata na dia ma songon godang ni Debatanami?

¹⁴ Ho do Debata na patupahon hahomangan, dipatangkas Ho do kuasoMu di tonga-tonga ni angka bangso.

¹⁵ Marhite hagogoanMu dipalua Ho bangsoMu, i ma pomparan ni si Jakob dohot si Josep.

¹⁶ Paida-ida Ho ale Debata, aek pe gabe mabiar, salang tandolan ni laut pe gabe humutur.

¹⁷ Diduruskon ombun i ma udan, ronggurna pe gumadobur; hilap humasiksak tu sude desa na walu.

¹⁸ Hilap pe margurasai, ronggur pe mardotur tano pe mangalalo jana humutur.

¹⁹ Mardalan do Ho mamolusi galumbang, didalani Ho lautan, hape andegeMu nada haidaan.

²⁰ Songon parmahan diiring-iring Ho bangsoMu, na nipimpin ni si Musa dohot si Harun.