MASMUR 75 - BIBEL JAMITA NA DENGGAN

Debata do panguhum partimbo

¹ Mandok tarimakasi do hami tu Ho, ale Debata! Mandok tarimakasi do hami. Hami pio do goarMi, hami paboa do pambaenanMu na godang i.

² Didok Debata, “Di hatiha na Hutontuhon, giot manguhumi Au marhite hatigoran.

³ Muda humutur tano on dohot sude pangisina Au do na pahotkon angka tiangna.

⁴ Hudok do tu halak siginjang roha, anso ulang be sai mamburas.

⁵ Jana tu halak parjahat anso ulang be sai manggakgak. Ulang manggodang diri sanga mandok hata ginjang ni roha.”

⁶ Angke nada sian Habincaran sanga Hasundutan haroro ni panguhuman, nada muse sian Utara sanga pe sian Selatan.

⁷ Tapi Debata sandiri do na manguhumi, diuhumi Ia do na sada jana dipalua Ia na sada nari.

⁸ Songon sada piala di tanganNia do hamuruhan ni Tuhan piala na marisi anggur na koras. Diduruskon Ia ma isi ni piala i sude ma parjahat na di tano on angkon manginumsa lopus abis.

⁹ Tapi anggo au paboaonku do tongtong pambaenan ni Debata ni si Jakob, endehononku ma puji-pujian diSia.

¹⁰ TipulkononNia ma hagogoan ni parjahat, hape anggo halak na burju mur margogo ma.