MASMUR 74 - BIBEL JAMITA NA DENGGAN

Tangiang anso mardeka bangso i

¹ Ale Debata, salolot-lolotna dehe tadingkononMu hami? Biasi torus muruk Ho tu bangsoMu sandiri?

² Ingot ma bangso na nadipulditMi sian narobi, bangso na nipaluaMu anso gabe bangsoMu sandiri. Ingot ma Dolok Sion, na nibaenMu gabe ingananMu.

³ Dalani ma inganan na dung gabe maronco, sandok na adong madung disegohon musu di inganan na badia i.

⁴ Marsurak ma angka musuMu marolop-olop di ingananMi, jana pajongjong mandera na gabe songon tanda.

⁵ Songon partaba na manaba hayu dohot pato do halahi na manaba hayu di harangan

⁶ disegoi halahi do sudena gorga hayu marhite pato dohot toko.

⁷ Disurbu halahi do inganan habadiaanMu lopus gabe tiranggong, pahodarkon inganan parsombaan maradopkon Ho.

⁸ Na giot manaluhon hami sude do halahi, jana manyurbu sude inganan parsombaon di luat on.

⁹ Nada haidaan be angka panurirang dohot angka tanda hahomangan, umpe sahalak umboto intap ni andigan laing songon on.

¹⁰ Intap ni andigan do, ale Debata, musu on sai mangincaki Ho? Sapanjangna noma he layasan ni halahi goarMi?

¹¹ Biasi nada diurupi Ho be hami? Biasi nada diantoi Ho be hami?

¹² Sian mulana laing na Ho do rajanami ale Debata, mulak-ulak do, ale Debata, dipalua Ho hami.

¹³ Marhite gogo na so hatudosan, mabola laut dibaen Ho, ulu ni naga laut marropukan dipotuki Ho.

¹⁴ Diropuki Ho angka ulu ni Lewiatan dibaen Ho do i gabe soroan ni binatang harangan.

¹⁵ Dibaen Ho do mual dohot batang aek na mardalan, dipahiang Ho batang aek na godang.

¹⁶ Ditompa Ho do arian dohot borngin, ditontuhon Ho do inganan ni bulan dohot mataniari.

¹⁷ Ditotopkon Ho do angka batas ni tano, dijadihon Ho do ari nonat dohot ari logo.

¹⁸ Ingot ma ale Tuhan, pangincahi ni musu i di Ho, marlayas goarMu dibaen bangso na so mananda Ho.

¹⁹ Ulang pasahat bangsoMu na so margogo i tu tangan ni musu na kejam i. Ulang ma salolotna halupahon bagian ni bangsoMu na mardangol.

²⁰ Ingot ma parjanjian na nibaenMi dohot hami on, angke manggolap do di sude ingananna di luat on, sai mangasahon gogo do sude jolma.

²¹ Ulang padiar halak na hona sosak marmalu-malu, anso dohot halak na dangol maradu na pogos mamuji goarMu.

²² Jongjong ma Ho ale Debata, bela ma parkaroMi! Angke diincahi do Ho sasadari, angka halak na so porsaya tu Ho mangincaki.

²³ Ulang ma halupahon parsurak-surak ni angka musuMu, hagaoran ni angka aloMu na mur manjebu!