MASMUR 73 - BIBEL JAMITA NA DENGGAN

BUKU PATOLUHON: MASMUR 73-89 Hatigoran ni Debata

¹ Satutuna burju do Debata mida na bulus roha, mida halahi na ias rohana.

² Hape anggo au madung ganggu rohangku, giot-giot mago noma haporsayaanku,

³ dibaen mangiburu do au mida halak siginjang roha, muda huida pardohar ni halak na jungkat.

⁴ Nada jungada halahi marnyae, margogo jana sehat do pamatang ni halahi.

⁵ Nada manaon na susa halahi nada tarsosak halahi songon na deba.

⁶ I ma da dalanna umbaen na gakgak halahi, jana sai mangasa gogo di pambaenanna i.

⁷ Gok hajahatan do roha ni halahi, sai giot mambaen sangkap na jat do pikiran ni halahi.

⁸ Sai na mangincaki do halahi jana pahata-hatahon, maradu sombong mangondam giot pasusahon.

⁹ Dibuka halahi do pamanganna mangalo langit, jana mamburas do dila ni halahi di tano on.

¹⁰ Hara ni i, angka halak pe marbalik ma tu halahi, ro mandapotkon halahi songon aek na marsaburan.

¹¹ Jana didok halahi, “Bia ma he pamboto ni Debata taringot tusi, adong ma he parbinotoan di Na Gumincat?”

¹² Songon i ma pangalaho ni parjahat, marjop ni roha di ngoluna, jana sinadonganna mur mabahat.

¹³ Nada adong hape gunana hujago rohangku tongtong pita, nada adong gunana mandao iba sian dosa.

¹⁴ Haru bia pe laing na ganop manyogot do au hona uhuman salolot arian laing na hona siksa do iba dibaen.

¹⁵ Sugari na dung songon i rohangku, nada marpangalaho be au songon sahalak sian bangsoMu.

¹⁶ Sai huparayak do laho mangastui, hape mamaoltu do anso iba mangarti.

¹⁷ Ujungna masuk au tu inganan na badia ni Debata, gabe huboto ma hasidungan ni parjahat.

¹⁸ Di dalan na landit do halahi hape dibaen Ho, dipadiar Ho do halahi madabu mago.

¹⁹ Maronco halahi di bagasan sangkinidop mata, jorbut ma da hasidunganna.

²⁰ Songon nipi na mago di manyogot, ale Tuhan, halahi pe mago ma di na ro Ho.

²¹ Dompak marnyae roha au, jana manaon hapaeton ni ngolu,

²² maoto au, nada mangastui, songon binatang do au di adopanMi.

²³ Hape laing donok do au di lambungMu, ditiop Ho do tangan siamunku.

²⁴ Ditogu Ho do au marhite sipaingot, jana giot lehenonMu hatuaan di au sogot.

²⁵ Ise dope he di au di banua ginjang i anggo nada Ho? Nada adong por ni rohangku di tano on asing sian Ho.

²⁶ Haru pe gabe gale pamatangku dohot rohangku, Ho do ale Debata hagogoonku; hum Ho sajo noma na huporluhon sudena salolot ni lolotna.

²⁷ Na giot mago do sanga ise na manadingkon Ho, dipatimpas Ho do sanga ise na so setia tu Ho.

²⁸ Denggan sajo do di au, hara ni na donok tu Debata, parondingan do hubaen Tuhan Debata, anso tarpajojor au pambaenanNia sudena.