MASMUR 72 - BIBEL JAMITA NA DENGGAN

Tangiang salaho di raja

¹ Ale Debata, ajarkon ma uhumMu tu raja, lehen ma hatigoranMu tu anak ni raja.

² Anso nian diadili bangsoMi mangihutkon aturan, jana dibaen ia na tigor tu halak na nisosakan.

³ Sai sonang jana maduma ma nian luatnami, jana dumpang hatigoran di sude bangso.

⁴ Sai diondihon raja ma nian hak ni rayat na pogos, diurupi raja ma halak na pogos jana ditaluhon angka na pangkilang.

⁵ Sai ginjang ma umurnia salolot adong mataniari, jana salolot adong bulan, sian sundut tu sundut.

⁶ Sai songon udan na mijur di padang ma ia, songon udan potir na mambornoki tano.

⁷ Salolot di ngoluna, sai mur tu jegesna ma manjarar hatigoran, jana donaon na marlobian saleleng adong dope bulan!

⁸ Sian laut tu laut mur mabidang ma harajaanna sian Batang aek Efrat lalu tu ujung ni portibi.

⁹ Angka bangso na di padang parhorsihan tunduk ma tusia jana marsomba muse di jolo ni patnia.

¹⁰ Angka raja ni Tarsis dohot angka pulo marsioban silua somba-somba ma tusia. Angka raja ni Arab dohot Etiopia marroan manaruhon gugu bolaanna.

¹¹ Marsomba ma sude raja di adopannia, jana sude bangso ma mangoloi ia.

¹² Halak na hona sosak na so margeldok, diurupi ia, dohot na pogos na pio-pio tusia.

¹³ Dihaholongi ia do halak na gale dohot na lebak, jana dipalua ia ngolu ni halak na so mardiha-diha.

¹⁴ Sian panyosak dohot na mangasa gogo, dipalua ia do halahi, angke arga do disia ngolu ni halahi.

¹⁵ Mangolu ma ia! Sai disombahon halak ma tusia sere na sian Arab. Sai ditangiangkon ma ia tongtong jana sai dipasupasu ma tongtong.

¹⁶ Sai lobian gandum ma nian sude luat on, jana angka dolokna i gok marisi suha ni tano. Sai napu ma nian tanona i songon Dolok Libanon, jana na mangingani kotana songon bahat ni ruput di padang.

¹⁷ Sai taringot ma di roha sapanjangna goarnia, manahan ma habonggalonna salolot adong mataniari. Sai dihalungunkon angka jolma ma nian dipasupasu songon ia, dohot sude bangso mandok ‘na martua ma da ia’.

¹⁸ Puji ma Tuhan ni Israel! Hum Ia do na patupahon pangalaho na godang.

¹⁹ Tarpuji ma goarNia na godang i sapanjangna; sai gok ma tano on dohot hamuliaanNia! Sai tulus ma songon i! Amen!

²⁰ Songon i ma angka tangiang ni si Daud, anak ni si Isai.