MASMUR 69 - BIBEL JAMITA NA DENGGAN

Tangiang dompak di hasusaan

¹ Ale Debata, palua ma au, maliput aek lalu tu tolonanku.

² Ronjom do au tu ombik na bagas, nada adong baen sidegean. Mogap au di aek na bagas, mayup-ayup dibaen galumbang ni pasang.

³ Pio-pio do au marsurak lopus loja jana mahiang tolonanku. Maniak huhilala matangku mararop roha di Debatangku.

⁴ Halak na magigi mida au di na so dalanna, umbahat sian obuk na di uluniba. Sai giot agohonon ni angka halak na gogo au, dipahata-hata halahi ma au dohot hata na so tutu. Dipaksa halahi au paulakkon arta na so hurampas.

⁵ Ale Debata, diboto Ho do angka hasalaanku nada buni sian adopanMu angka dosangku.

⁶ Ulang paloas au bonsir ni malu-malu maradopkon halak na mararop roha tu Ho, ale Tuhan, Debata Na Markuaso. Ulang paloas au gabe bonsir ni pardangolan, maradopkon halak na marsomba tu Ho, ale Debata ni Israel!

⁷ Angke hara ni Ho do umbaen na ni palayas au, hara ni Ho do hona incak au.

⁸ Gabe songon halak na asing do au di kahanggingku, songon halak sileban di koum sisolkotku.

⁹ Holong ni roha tu BagasMu pagurgurkon rohangku, incak ni halak na palayas goarMu mandondoni au.

¹⁰ Huparkanciti do diringku marhite na puaso, hape habilean do na hujagit.

¹¹ Mamake abit goni do au tanda ni hamarsakan, hape dalan do i di halahi gabe sindiran.

¹² Gabe sihata-hataan ma au di parluhutan ni halak, diendehon angka parmabuk ma salaho tu iba.

¹³ Tapi tu Ho ma au martangiang, ale Tuhan, ale Debata, alusi ma i di hatiha na tumbuk tu hagiot ni rohaMu, angke na marlobian do holong ni rohaMu na manongtong i; urupi ma au hara ni denggan ni rohaMi.

¹⁴ Ulang padiar au bonom di bagasan ombik, palua ma au sian musu dohot sian aek na bagas.

¹⁵ Ulang padiar au diayup galumbang ni pasang, mogap di tandolan ni laut sanga dipabuni di bagasan liang.

¹⁶ Alusi ma au, ale Tuhan, angke na burju do Ho jana parholong roha. Sai ra ma Ho mangadopkon au angke na godang do ibo ni rohaMu.

¹⁷ Ulang Ho martabuni tu au, naposoMon, susa do au, ompoti ma mangurupi au.

¹⁸ Ro ma Ho paluahon au, palua ma au sian angka musungku.

¹⁹ Diboto Ho do incak-incak, hahaila bope tilako na tu au, diboto Ho do sude musungku.

²⁰ Magopu pangkilalaanku hara ni tilako malu-malu, gabe putus asa noma au. Sai hujalahi do halak na maribo ni roha nian hape so adong, hulului pangapoi, hape magopo do.

²¹ Di hatiha male au, rasun do dilehen di au, di na manguas au, cuka do dilehen di au.

²² Sai gabe hamamagona sandiri ma pesta ni halahi, jana gabe bala ma nian pesta pangupaan ni halahi.

²³ Sai gabe mapitung nian mata ni halahi, jana gale hayu tanggurungna i.

²⁴ Palalu ma da hamumurukMu tu halahi, sai didondoni rimasMu ma nian halahi.

²⁵ Pasidung ma halahi sudena, lopus mamolngit parundung-undunganna.

²⁶ Angke diparhanciti halahi do jolma na niuhumMu, dipahata-hata halahi do halak na nisiksaMu.

²⁷ Paborat ma da uhuman i tu halahi; ulang be patigor-tigor halak na songon i.

²⁸ Sugari nisesa noma gumonan goar ni halahi sian buku ni halak na mangolu, indangkon sai disuratkon be i di panyuratan ni goar-goar ni halak na tigor.

²⁹ Hona sosak do au on jana hancitan, angkat ma au ale Debata, jana palua ma au.

³⁰ Jadi gabe pujionku ma Debata marhite ende, pagodangonku ma Ia marhite puji tarimakasi.

³¹ Jopan do roha ni Debata mida pujian ulang pado haul lombu, lombu jantan na godang.

³² Marjop ni roha ma na dangol, marnidasa margodang ni roha ma halak na manyomba Debata.

³³ Dibaen ditangihon Tuhan antong halak na lebak, nada dihalupahon Ia bangsoNia na di hurungan.

³⁴ Puji ma Debata, ale langit dohot tano, laut dohot sude pangisina.

³⁵ PaluaonNia noma Sion, jana pajongjongonNia mangulahi angka kota ni Juda. Maringanan disi noma bangso i; tano i gabe halahi noma nampunasa,

³⁶ jana pateankonon tu pomparanna; angka halak na manghaholongi Tuhan noma manginganisa.