MASMUR 68 - BIBEL JAMITA NA DENGGAN

Ende hamonangan

¹ Jongjong ma Debata manyarsarkon musuNia, marlojongi ma na mangkagigihon Ia sian joloNia.

² Mago ma halahi songon timus ni api. Songon lilin na malala di bagasan api, lintop ma parjahat sian adopan ni Debata.

³ Hape anggo halak na daulat marmoga-moga, marolop-olop di jolo ni Debata.

⁴ Marende ma hamu di Debata, puji ma goarNia, parade ma dalan diSia na markareta ombun. Tuhan do goarNia, marolop-olop ma di joloNia.

⁵ Debata na maringanan di ingananNia na badia, i ma da Ama ni na so marama jana Pangondian ni angka na mabalu.

⁶ Dilehen Ia do inganan di halak na tarpunjung dilehen Ia haluaan dohot hatuaan di halak na tarhurung. Hape anggo halak na mangalo Tuhan, angkon maringanan do di tano na harsang.

⁷ Di na nitoguMu bangsoMu, ale Debata, mardalan mamolus padang na hiang,

⁸ humutur do tano on, diduruskon langit i do udan; di joloMu ale Debata; humutur do Sinai di jolo ni Debata, Debata ni Israel.

⁹ Marlobian dipaijur Ho udan, tanoMi na harsang i dibaen Ho sumuang.

¹⁰ Gabe maringanan disi bangsoMu, di bagasan denggan ni rohaMu ale Debata, dipature-ture Ho halak na pogos.

¹¹ Dibaen Tuhan ma tanda panggora, jadi dioban angka dadaboru ma barita:

^12-13 “Ma pola maporus angka raja dohot paranganna, songon darapati halahi kehe habang.” Di bagas, marbagibagi ma angka dadaboru i perak dohot sere na martadingan i. Haru pe bahat na so dohot marporang, bangso ni Debata do hape na monang.

¹⁴ Mijur ma salju sian Dolok Salmon di na nipasarak ni Na Markuaso i angka raja-raja disi.

¹⁵ Dolok Basan i ma dolok na marhasurungan, dolok na bahat do puncutna.

¹⁶ Biasi ma manatap mangiburu ho Dolok Basan sian puncutna na bahat i tu Dolok Sion na nitodo ni Debata baen ingananNa? Angke i do na gabe Parmianan Ni Tuhan salolot-lolotna.

¹⁷ Mardongan angka kareta na togu, bahatna marpulu ribu, ro ma Tuhan sian Sinai tu ingananNa Na Badia i.

¹⁸ Manaek ma Ia tu inganan na gincat mardongan sahala, bahat do dioban Ia angka na tartaban; jana dijagit Ia do silua somba-somba sian angka jolma, jana dohot sian angka pangalo, anso maringan. halahi rap dohot Tuhan Debata.

¹⁹ Puji ma Tuhan Debata, na palua hita, sian ari tu ari diporsan Ia do bobanta.

²⁰ Debata na paluahon do anggo Debatanta Debata, Tuhanku mangalehen haluaan sian hamatean.

²¹ Satutuna ropuhan ni Debata do ulu ni musuNia, i ma ulu ni halak na laing hot mangolu di bagasan dosa.

²² Didok Tuhan, “Hamu bangsongKu, Huoban do musumu sian Basan, Huoban mangulahi halahi sian tandolan ni lautan,

²³ anso basu hamu patmunu dohot mudar ni halahi, jana angka pananggamunu sabutong-butongna mandilati.”

²⁴ Sude do marnida barisan ni hamonanganMu, ale Debata, Debatangku, Rajangku, diudurkon tu inganan na badia.

²⁵ Mardalan ma di jolo angka parende, di pudina ma angka parhasapi; di tonga ma angka nauli bulung partambor; songon on ma da ende ni halahi,

²⁶ “Puji ma Debata di tonga-tonga ni parlagutan ni bangsoNa, puji ma Tuhan, o hamu pomparan ni si Jakob sudena!”

²⁷ Ligi ma, indi ma si Benyamin marga siampulan i, mardalan dijolo, ihut angka pamimpin ni Juda sibahat-bahat i. Mardalan ma di pudi ni halahi angka pamimpin ni Zebulon dohot Naftali.

²⁸ Ale Debata, patuduhon ma hagogoonMu, hagogoan na dibaenMu hara ni hami bangsoMu.

²⁹ Sai marsioban silua somba-somba ma angka raja baen di BagasMu di Jerusalem kota na badia.

³⁰ Songgakkon ma, binatang panyoro di arung-arung, gorahon ma angka bangso na gogo dohot panguasa ni angka bangso. Taluhon ma halahi na mangkojar sinadongan; sarsarkon ma angka bangso na manghagioti parporangan.

³¹ Dioban halak sian Mesir angka barang na sian tumbaga; pahortang tangan halak Sudan laho martangiang tu Debata.

³² Marende ma di Debata, o hamu sude harajaan, endehon ma puji-pujian di Tuhan,

³³ diSia na mamolus awang-awang, angkasa na adong sian narobian. Tangihon bo! Gogo do Tuhan mandok hata, matuoror maradu gogo, soraNia.

³⁴ Pabotohon ma bahaso Debata do di Israel mamarenta, di ginjang ni angka ombun markuaso Debata.

³⁵ Homang ma da roha mida tangan ni Debatanta muda ruar Ia sian parmiananNia. Dilehen Debata ni Israel do di bangsoNia hagogoan dohot kuasoNa. Puji-pujian ma di Debata!