MASMUR 66 - BIBEL JAMITA NA DENGGAN

Ende pujian dohot tarimakasi

¹ Marsurak-surak ma di Debata, o hamu sude na satano on!

² Endehon jana pagodang ma goarNia, pasangap ma Ia marhite puji-pujian.

³ Dok ma tu Debata, “Hahomangan godang do antong pambaenanMu!” Tunduk tu Ho angka musu jabat bajoraon, hara ni godang ni kuasoMu.

⁴ Sude tano on tunduk marsomba di adopanMu, marende do halahi mamuji goarMu.

⁵ Ro ma hamu mangaligi angka pambaenan ni Debata, sumurung do antong homang ni roha di pambaenanNia maradopkon jolma!

⁶ Dipauba Ia laut i gabe tano na hiang, ditaripari ompunami do i mardalan pat. Dibaen i marjop ni roha hami hara ni sude pambaenanNa i.

⁷ Marhite hagogoon mamarenta Ia salolot-lolotna. Dimatai Ia angka bangso anso ulang lobas pangalo i palalu rohana tuSia.

⁸ O hamu angka bangso, puji hamu ma Debatanami, pagogo hamu ma soramunu mamuji Ia!

⁹ Dijagohon Ia do hami anso tongtong mangolu, jana nada dipadiar Ia hami dabu.

¹⁰ Ale Debata, madung diuji Ho do hami, songon na papitahon perak di bagasan api.

¹¹ Dipadiar Ho do hami masuk tu bagasan tirangkap, dilehen Ho di hami boban na lobi borat.

¹² Dipadiar Ho do didege-degei musu hami, hami bolus aek magodang dohot api. Hape anggo saonnari dioban Ho do hami tu inganan na sonang so haribo-riboan.

¹³ Ro do au maroban haul situtungon tu BagasMu, jana hugohi tu Ho janjingku,

¹⁴ janji na hupajojor dompak di bagasan hasusaan au.

¹⁵ Giot haulkononku tu Ho haul situtungon sian pahan-pahanan na nipamokmok. Haulkononku hambeng dohot lombu jantan; jop ma rohaMu di timusna i.

¹⁶ Ro ma, jana tangihon hamu ma, o sude hamu na burju, paboaonku ma pambaenan ni Debata tu au.

¹⁷ Madung pio-pio au tuSia mangido pangurupionNa, saonnari marende au mamuji Ia.

¹⁸ Sugari na sonang rohangku mamikir hajahatan, pasti nada ra Tuhan umbegean.

¹⁹ Hape madung ditangihon Tuhan au, diparrohahon Ia do pangidoanku.

²⁰ Hupuji do Debata dibaen nada ditulak Ia tangiangku, sai dihaholongi Ia do au.