MASMUR 63 - BIBEL JAMITA NA DENGGAN

Malungun di Debata

¹ Ale Debata, Ho do Debatangku hujalahi jana huhalungunkon do Ho. Songon tano gariang na mahiang na manguas di aek, songon i ma tondingku manguas di Ho.

² Paloas ma au manatap tu Ho di inganan na badia, bope mangaligi hagogoan dohot hamuliaonMu.

³ Ummarga do holong ni rohaMu na manongtong i ulang hangoluan, i ma dalanna umbaen hupuji Ho.

⁴ Mandok tarimakasi do au tu Ho salolot au mangolu, angkatonku ma tanganku lalu martangiang tu joloMu.

⁵ Pujionku do Ho marhite angka ende na riang-riang, dibaen dipasombu Ho rohangku songon na mangankon sipanganon na tabo.

⁶ Di na payak au di podoman, huingot do tu Ho; sasaborngin sai huhalungunkon do Ho,

⁷ angke Ho do antong na mangurupi au, marriang-riang au marende di linggom ni habongMu.

⁸ Hutiop Ho togu, malua au hara ni hagogoon ni tanganMu.

⁹ Hape anggo angka jolma na giot mamunu au manuat noma i tu inganan banua toru.

¹⁰ Mate ma halahi di parporangan jana gabe papanganan ni binatang sorigala.

¹¹ Marjop ni roha ma raja i dibaen dilehen Debata disia hamonangan. Pujion ni halak na marsumpa mangasahon Debata ma ia, tapi anggo pargabus huntamon do pamanganna.