MASMUR 61 - BIBEL JAMITA NA DENGGAN

Tangiang mangido pangondian

¹ Tangihon ma ale Debata angguk-anggukku jana parate-atehon ma tangiangku.

² Di na mandele au, dao sian bagas, mangguk-angguk do au tu adopanMu. Taruhon ma au tu pangungsian na sonang,

³ angke Ho do diau pangondian partahanan na gogo maradopkon musungku.

⁴ Padiar mamanompang di undung-undungMu au salolot au mangolu, anso sonang au di linggoman ni habongMu.

⁵ Angke madung ditangihon Ho janjingku, ale Debata, jana madung dilehen Ho di au angka na patut di ganup na porsaya tu Ho.

⁶ Sai ginjang nian umur ni raja i lopus marsundut-sundut.

⁷ Sai mamarenta ia songon raja na nitodoMu ro di salolot ni lolotna. Ale Debata, linggomi ma ia marhite hasetiaanMu dohot holong ni rohaMu na so mantak i.

⁸ Jadi anggo au, endehononku ma pujian di Ho, lalu hupatulus janjingku sian ari tu ari.