MASMUR 60 - BIBEL JAMITA NA DENGGAN

Tangiang mangido pangurupion

¹ Di bagasan hamumurukMu diponggol Ho do partahanannami, jana nada ra Ho ale Debata rap dohot hami. Tapi anggo saonnari, mulak ma Ho tu hami.

² Humutur do dibaen Ho tano on lopus gabe marotak, padoMu ma na mangkahoping i, angke meol-eol tano on.

³ Dipadiar Ho do hami bangsoMon marnyae na so tartaon, songon halak na mabuk hami marambalan.

⁴ Dilehen Ho do dalan di halak na marsitutu marugamo, anso laing bolas malua sian uhuman,

⁵ anso malua angka halak na nihaholongan ni rohaMu. Lehen ma hamonangan marhite kuasoMu jana tangihon ma tangiangnami.

⁶ Sian inganan na badia didok Debata, “Marhite jop ni roha Hubagi-bagihon tano Sikem, bagi-bagihononKu ma Rura Sukot.

⁷ Au do nampuna Gilead dohot Manase, Efraim kupia bajangku jana Juda tungkot harajaonKu.

⁸ Tapi anggo Moab inganan pamasuan ni patKu do i, tu Edom Hudanggurkon sipatungKu tanda ni na Au nampunasa. Marsurak Au surak hamonangan maradopkon Pilistea.”

⁹ Ise do na giot maroban au tu kota na marbenteng? Ise do manogu au tu Edom?

¹⁰ Ale Debata, situtu ni rohaMu do nada rap dohot hami? Nada he maju Ho rap dohot tentaranami i?

¹¹ Urupi ma hami maradopkon musunami, angke parcuma do anggo pangurupi ni jolma!

¹² Rap dohot Ho ale Debata, pir do rohanami, sai Ho ma manaluhon musunami.