MASMUR 57 - BIBEL JAMITA NA DENGGAN

Tangiang mangido pangurupion

¹ Ibo ma rohaMu, mida au, ale Debata, ibo ma rohaMu di au, angke marpangondian tu Ho do au. Di linggoman ni habongMu do au martabuni, lopus mantak angka panyego-nyego i.

² Pio-pio do au tu Debata Na Gumincat i, tu Debata na patupahon sude haporluanku.

³ Dipalua jana dialusi Ia au sian banua ginjang; ditaluhon Ia angka halak na manyosak au. Patuduhonon ni Debata do paboa na denggan rohaNia tu au, jana na sai manghaholongi au.

⁴ Dihobuk musu au, songon singa sipangan jolma halahi. Hujur dohot pana do ipon ni halahi, podang na tajom do dila ni halahi.

⁵ Ale Debata, patuduhon ma hagodanganMu di langit an, dohot hasangapanMu di portibi on.

⁶ Ditaon musungku do jorgong tu au, digohi biar do rohangku. Dihuar halahi do godung di dalanku, hapengani halahi sandiri tu bagasan madabu.

⁷ Dabu rohangki, ale Debata, dabu rohangki, marende noma au jana mamuji.

⁸ Ngot ma Ho tondingku, ngot ma gambus dohot hasapi, giot sunggulanku ma andostorang i.

⁹ Ale Tuhan, giot mandok tarimakasi ma au tu Ho di tonga-tonga ni angka bangso. Giot pujionku ma Ho di tonga-tonga ni jolma manusia.

¹⁰ Holong ni rohaMu na manongtong i sagincat ni langit, jana denggan ni rohaMu sagincat ni angka ombun.

¹¹ Ale Debata, patuduhon ma hagodanganMu di langit i, dohot hamuliaonMu di sandok portibi on.