MASMUR 56 - BIBEL JAMITA NA DENGGAN

Di bagasan hasusaan mararop roha tu Debata

¹ Ibo ma rohaMu di au ale Debata, angke disosak musu do au, sai torus do diporangi halahi au.

² Sasadari sai diporangi halahi do au, bahat ma da na mamusui au mardongan ginjang ni rohana.

³ Muda mabiar au, mararop roha tu Ho do au.

⁴ Hupuji do Ho ale Debata, hara ni na nijanjihonMi; tu Ho do au marpos ni roha, gabe nada au mabiar; nada tarbaen jolma sanga na aha tu au.

⁵ Sasadari do susa au dibaen musu, na torus marniet laho mangago au.

⁶ Marlagut ma halahi di partabunian, jana pamanatkon sandok na nipambaenan, manjalahi hatiha na denggan laho mamunu au.

⁷ Balos ma ale Debata hajahatan ni halahi i, pasidung ma halahi di hamumurukMi.

⁸ Diboto Ho do godang ni sitaononku, torang do di rohaMu ilu-ilungku. Nada he tarsurat do sudena i di bukuMu?

⁹ Di ari na pio-pio au tu Ho, ale Debata, sumurut ma musungku hona ayak, angke pos do rohangku tu au do Ho marpihak.

¹⁰ Hupuji do Ho ale Debata, hara ni na nijanjihonMu, hupuji ma Ho ale Tuhan, hara ni na nipadankonMu.

¹¹ Mararop roha tu Debata do au, nada mabiar au, nada tarkahua jolma au.

¹² Patulusonku ma janjingku tu Ho, ale Debata haulkononku tu Ho haul hatarimakasion.

¹³ Dibaen dipalua Ho au sian hamatean, jana dijagohon Ho au gabe nada ditaluhon. Gabe tola ma au mangolu di bagasan pangondingan ni Debata, di bagasan sinondang na manorangi sandok na mangolu.