MASMUR 55 - BIBEL JAMITA NA DENGGAN

Tangiang mangido pangondian maradopkon musu

¹ Ale Debata, tangihon ma tangiangku, ulang mandao Ho sian pangidoanku.

² Tangihon jana alusi ma au, maloja au hara ni hasusaanku.

³ Lebak do au hara ni pangondam ni musu dibaen panyosak ni halak na jahat, angke disusai halahi do ngolungku, jana panyogo-nyogoon do halahi mamusui au.

⁴ Hum na susa do rohangku, diayak-ayak hajorbuton ni hamatean do diringku.

⁵ Didondoni biar do au jana humitir, dirongomi pangkilalaan na manyikur.

⁶ Iale, sugari adong ma nian habongku songon darapati, habang noma au manjalahi inganan na sonang.

⁷ Olo da, habang noma au tu sihadaoan, jana maringanan di padang halongonan.

⁸ Marhuras noma au manjalahi inganan panyisioan maradopkon alogo na gogo dohot halingsungsung.

⁹ Sursari ma ale Tuhan, parkobaran ni musungku, angke huida do na mangasa gogo dohot hagaoran di kota.

¹⁰ Arian dohot borngin do halahi manghaliangisa, hajahatan dohot mara do marroha-roha di bagasanna.

¹¹ Sanga na di dia pe, masa na mangaroncohon, angka dalanna pe gok panyosak dohot panipuon.

¹² Sugari musu na manggorahon au, laing tahan dope da au. Sugari musu na manilakoi au, laing tarbaen au dope sian ia martabuni.

¹³ Tapi dibaen sian ho do antong, donganku, ale-alengku, dongan ari-ari di au.

¹⁴ Na salpu i manghata-hatai do hita denggan-denggan, jana rap marsomba hita di Bagas Ni Debata.

¹⁵ Padiar ma mate ompot musungki, mangolu-ngolu dibondut hamatean i, angke marroha-roha do hajahatan di bagas ni halahi, lopus tu bagasan roha ni halahi i.

¹⁶ Tapi pio-pio do au tu Debata, paluaon ni Tuhan do au.

¹⁷ Hape humolos do au jana tangis arian dohot borngin, tangihononNia do sorangku.

¹⁸ BoanonNia do au mulak di bagasan hahorasan, sian parporangan mangalo musu na bahat.

¹⁹ Debata na mamarenta sian narobi, tangihononNia do au jana taluhononNa halahi. Angke nada ra halahi porsaya, jana nada mabiar tu Debata.

²⁰ Donganku humani mangalo angka donganna, disoadahon ia janjinia.

²¹ Lambok ni hatania mangapus pusu-pusu, hape rohania gok hagigian. Pangkataina maradu lambok, hape manorusi songon podang na tajom.

²² Pasahat ma holos ni rohamu tu Tuhan, jadi pargogoanNia ma ho, angke nada unjung Ia padiarkon halak na tigor ditaluhon.

²³ Tapi anggo Ho ale Debata, sampakkononMu ma halahi tu bagasan lubang na umbagas. Angka panghianat dohot na manduruskon mudar, nada lalu bolusonna satonga ni umurna. Hape anggo au, tu Ho do au porsaya.