MASMUR 52 - BIBEL JAMITA NA DENGGAN

Uhum tu halak na jahat

¹ O jolma na gogo, biasi hagodangkononmu hajahatan na nibaenmu tu halak na nihaholongan ni Debata?

² Mangicu jana mambaen sangkap na jat do ho sasadari, dilamu pe songon piso cukur na tajom.

³ Humolong do rohamu di hajahatan ulang di hadengganan, dohot gabus ulang pado hasintongan.

⁴ O pangicu, marhite angka hatamu sai dihagioti ho do pahancit roha ni halak!

⁵ Tapi roncohonon ni Debata do ho muse salolot-lolotna; sian bagasmu ho tangkupon jana saratonNia, jana tu inganan ni na mate ma ho paimbaronNa.

⁶ Paida-ida i, mabiar ma halak na daulat, jana partataanna ma ho lalu didok ma,

⁷ “Indi ma da halakna na so marpangondian tu Debata, tapi na sai mangasahon sinadonganna dohot hajahatanna.”

⁸ Hape anggo au tarsongon bona ni zetun na rata do di bagasan Bagas Ni Debata. Huhaporsayai do holong ni rohaNia na manongtong i ro di salolot-lolotna.

⁹ Sai giot mandok tarimakasi do au tu Ho, hara ni pambaenanMu, ale Debata. Di tonga-tonga ni parlagutan ni bangsoMu, giot paboaonku do hadenggananMu.