MASMUR 51 - BIBEL JAMITA NA DENGGAN

Tangiang mangido ampun

¹ Ibo ma jolo rohaMu mida au, ale Debata mangihutkon denggan ni rohaMu dohot holong ni rohaMu. Sesa ma pangalaosingku mangihutkon ibo ni rohaMu.

² Basu ma sude hajahatanku paias ma au sian sude dosangku.

³ Huboto do angka hasalaanku, sai taringot do di rohangku angka dosangku.

⁴ Maradopkon Ho, maradopkon Ho sajo do au mardosa, jana hukarejohon do angka na jahat dietong Ho. Anso tutu Ho tigor di bagasan angka hataMu, jana monang muda manguhumi Ho.

⁵ Olo tutu do na jahat au mamungka sorang, dirajai dosa do au mamungka sian bortian.

⁶ Haiason dohot habulusan ni roha do dipangido Ho, gohi ma rohangku dohot habisuhonMu.

⁷ Buat ma dosangki, gabe ias ma au; basu ma au, jadi gabe umbontar ma au sian hapas.

⁸ Paloas ma au umbege barita jop ni roha, anso marsurak mangulahi roha na nigopuMon.

⁹ Padao ma panailiMu sian dosangku, sesa ma sude hasalaanku.

¹⁰ Tompa ma roha na polin di au, ale Debata, paimbaru ma rohangku di bagasan dohot tondi na marsihohot.

¹¹ Ulang ambungkon au sian adopanMu, jana ulang buat tondiMu na badia i sian au.

¹² Baen ma au marjop ni roha mangulahi hara ni haluaan na sian Ho, padiar ma anso sian jop ni rohangku burju au mangoloi Ho.

¹³ Jadi ajarkononku ma parentaMu tu halak pardosa, anso mulak tu Ho sanga ise na mangalaosi aturanMu.

¹⁴ Palua ma hosangku, ale Debata Sipalua au, gabe marjop ni roha ma au paboa-boahon hatigoranMu.

¹⁵ Urupi ma au mandok hata, ale Tuhan, jadi gabe pujionku ma Ho.

¹⁶ Haul na nisambol nada tabo di pangkilalaanMu; sugari pe huhaulkon haul situtungon, nada jop rohaMu.

¹⁷ Anggo haul na tabo di Ho, ale Debata, i ma roha na magopu, roha na unduk jana na muba nada ditulak Ho.

¹⁸ Ale Debata, patuduhon ma denggan ni rohaMu tu Sion, pajongjong ma mangulahi angka tembok ni Jerusalem.

¹⁹ Gabe jop ma rohaMu manjagit haul na patut, haul situtungon na hami haulkon di Ho; dihaulkon ma lombu jantan di ginjang ni langgatanMu.