MASMUR 50 - BIBEL JAMITA NA DENGGAN

Ibadat na satutuna

¹ Mangkuling ma Tuhan, Debata Na Markuaso i; pio-pio ma Ia tu sude portibion sian Habincaran lopus tu Hasundutan.

² Sian Sion, kota na jumeges, marsinondang Debata maradu torang.

³ Na ro ma Debatanta, nada be so sajo Ia, dijoloani api na marjilam-jilam do Ia, jana dihaliangi habahaba na gogo.

⁴ Dipiohon Ia langit dohot tano, laho manyaksihon Ia manguhumi bangsoNia.

⁵ Diparentahon Ia do tu halahi laho palagutkon bangsoNia di joloNia; bangso na dung mangikat janji dohot Ia, jana na manghaulkon haul situtungon tuSia.

⁶ Dipabotohon langit do hatigoranNa, angke Debata sandiri do panguhumNa.

⁷ “O Israel, giot mandok hata Au; o hamu bangsongKu, tangihon hamu sude ma Au. Giot saksihononKu tu hamu, Au do Debata, Debatamunu.

⁸ Nada hara ni haulmunu i umbaen na Huuhumi hamu; sai di jolongKu do anggo haul i na nitutungmunu.

⁹ Nada porlu di Au lombu na sian barana, hambeng na sian habananna i pe nada porlu di Au;

¹⁰ angke Au do nampuna sude binatang na di harangan, dohot pahan-pahanan di angka dolok na marribu.

¹¹ Au do nampuna sude unggas na di awang-awang i, sude mahluk na mangolu na di halongonan i.

¹² Muda male Au, nada pola paboaonKu i tu ho, angke Au do nampuna portibi on dohot isina.

¹³ Nada Hupangan juhut ni lombu jantan, nada muse Huinum mudar ni hambeng jantan.

¹⁴ Haul haluaan ma haulkon tu Au, Debata Na Gumincat patulus ma janjimu tu Au.

¹⁵ Muda ro hasusaan, pio-pio ma ho tu Au paluaonKu ma ho, jana pujionmu ma Au.”

¹⁶ Tapi anggo tu halak na jahat didok Debata do, “Nada adong hakmu pajojorkon aturanKu, dohot mandok hata satongtang tu parjanjianKu.

¹⁷ Nada ra ho manjagit sipaingotKu, jana ditulak ho do angka parentangKu.

¹⁸ Dipardongan ho do ganop panangko na niidamu, angka halak pangalangkup dibaen ho do gabe donganmu.”

¹⁹ Matua sai mandok na jat do ho, tongtong hobas mardongan sipaoto-oto.

²⁰ Sadihari sajo, matua na pabile kahanggimu do ho, jana pahata-hata donganmu saama-saina.

²¹ Dibaen ho ma i sudena, tapi laing Hupahohom do, diambang ho do lakna sarupa bakonta. Tapi anggo saonnari uhumonKu ma ho jana parkarohononKu ma i.

²² Parate-atehon jana ingot hamu ma, hamu angka na dung lupa tu Debata, jago ma hamu anso ulang jabat hona pusa, jana nada adong be na mambaen malua.

²³ Sanga ise na mandok tarimakasi baen haulna, i do na pasangapkon Au. Tu halak na tigor ngoluna, patuduhononKu ma haluaan na sian Au.