MASMUR 48 - BIBEL JAMITA NA DENGGAN

Sion Kota Ni Debata

¹ Na godang do Tuhan jana na tarpuji situtu di Kota Ni Debatanta, di dolokNia na badia.

² Sion, dolok ni Debata na jeges jana gincat marsijongjong, kota ni Raja Godang hajopan ni roha ni sude portibi on.

³ Pandok ni Debata, sonang do rap dohot Ia, di bagasan angka benteng ni kotaNia.

⁴ Ligi bo, marlagut do angka raja, ro halahi tu Dolok Sion laho mangaroro.

⁵ Hape paida-ida dolok i, gabe ngangang halahi; gaor halahi jana maturubus marlojongi.

⁶ Humitir be ma halahi mabiar disi jana mangae na hancit songon ina na giot di api.

⁷ Songon kapal na dumaol-daol diombus alogo.

⁸ Songon na tabege i, saonnari ma taida, di Kota Ni Tuhan Na Markuaso i. Kota Ni Debatanta ma da kota i, Ia do manjagohon i anso sonang sapanjangna.

⁹ Ale Debata, di bagasan BagasMu, hami ingot do holong ni rohaMu.

¹⁰ Tarbonggal do goarMu jana tarpuji di sude tano on, marbungaran do Ho mamarenta.

¹¹ Sai marjop ni roha ma rayat ni Sion dohot Juda marsorak-sorak, dibaen diuhumi Ho do alo ni halahi.

¹² Haliangi ma Sion jana bolusi, jana etong ma palas-palasna i.

¹³ Pamanat ma tembokna, pareso ma bentengna, anso tarturihon hamu i tu angka na umposo.

¹⁴ Paboa Ia do Debata, Debatanta sapanjangna, uluhononNia ma hita salolot-lolotna.